बिर्तामोड । इलाम नगरपालिका वडा नम्बर २ सुम्बेक निवासी सीता (दुर्गा) राईको समयमा अस्पताल पुर्याउन नसक्दा ज्यान गएको छ । सर्पदंशका घाइते राईलाई समयमा चारआली स्थित सर्पदंश उपचार केन्द्रमा पुर्याउन नसक्दा ज्यान गएको हो ।

राईलाई आइतबार राति शौचालय जाने क्रममा ब्लाक हिमालयन करेत नामक विषालु सर्पले डसेको बताइएको छ । उनलाई उपचारका लागि सर्पदंश उपचार केन्द्र चारआली ल्याइएपनि त्यहाँबाट बीएण्डसी अस्पताल पठाइएको थियो । उनको उपचारको क्रममा निधन भएको वडाध्यक्ष गिरीराज रिजालले जानकारी दिए ।

आइतबार राति १०ः४५ बजे राईलाई सर्पले डसेको र ११ बजे उपचारका लागि ल्याइएको तर सडकका कारण विहान ४ बजेमात्र चारआलीस्थित सर्पदंश उपचार केन्द्रमा ल्याइपुर्याइएको वडाध्यक्ष रिजालले बताए ।

केहिदिन अघि आएको अबिरल बर्षाका कारण इलाम–राजदुवाली सडक खण्ड पूर्णरुपमा क्षति भएका कारण राईलाई माइजोगमाईस्थित नयाँबजार–फिक्कल हुँदै झापा ल्याइएको बताइएको छ । सो बाटो घुमाउरो र केहि सडकखण्ड कच्ची भएकाले समयमा ४२ बर्षीया राईलाई उपचार केन्द्र पुर्याउन नसक्दा ज्यान गुमाउनु परेको  स्थानीयले बताएका छन् ।

राईको एक श्रीमान र आठ बर्षीया छोरी रहेका छन् ।