न्यू मिडियाको विकास र प्रविधिमा पाठकको बढ्दो पहुँचलाई मध्यनजर गरी अनलाईन पत्रकारितामार्फत नागरिकको सुसूचित हुने हकको सम्मान गर्दै हामीले शुरु गरेको यात्रा आजबाट तेस्रो बर्ष पूरा गरी चौथो बर्षमा प्रवेश गरेको छ ।

परिवेश डिजिटल मिडिया प्रालिद्वारा सञ्चालित यस परिवेश मिडियाले संविधानको कार्यान्वयन, यसको रक्षा, समावेशी समाजको निर्माण, सुशासन र लोकतन्त्रको पक्षमा समाचार सम्प्रेषण गरिरहेको छ । भ्रष्टाचार, दुराचार, अन्याय र अत्याचारजन्य गतिविधि जसले समाजको विकासमा बाधा पुर्याइरहेका छन् त्यस्ता कृयाकलापको खोजमुलक रिपोर्ट सम्प्रेषण गरिरहेको छौँ ।

चौथो अंगको रुपमा मानिएको सञ्चार क्षेत्रले प्रतिपक्षको भूमिका निर्वाह गरिरहेको आभाष हुन्छ । मुलुक संघीयतामा गइसकेपछि महत्वपूर्ण संरचनाको रुपमा रहेको स्थानीय तह प्रतिपक्षविहिन हुन्छन् र पछिल्लो तथ्याङ्कले सबैभन्दा बढी भ्रष्टाचार स्थानीय तहमा हुने गरेको देखाएको छ । हामी त्यस्ता गतिविधीको खुलेर विरोध गरिरहेका छौँ र त्यस्ता समाचारलाई प्राथमिकताका साथ पाठक माझ पुर्याइरहेका छौँ ।

तथ्यपरक समाचार पाठकमाझ अबिलम्ब पुर्याउनु हाम्रो ध्येय रहेको छ । आवाजविहिनहरुको आवाजको रुपमा परिवेश मिडियालाई विकास गरिरहेका छौँ । हामीलाई यहाँसम्म आउन सहयोग र हौसला प्रदान गर्नुहुने प्रिय पाठकजन, विज्ञापनदाता, सम्पादन तथा व्यवस्थापन समूह र सम्पूर्ण शुभेच्छुकहरु प्रति आभार व्यक्त गर्दछौँ ।