बिर्तामोड । चाडपर्व लक्षित गरी सशस्त्र प्रहरी बल, नेपालले झापाका विभिन्न ६ स्थानमा सहायता कक्ष (हेल्प डेस्क) स्थापना गरेको छ । झापाको गौरीगञ्ज, टागनडुब्बा, घेराबारी, महेशपुर, भद्रपुर र काँकरभिट्टामा सहायता कक्षा स्थापना गरिएको हो ।

काँकरभिट्टा नाका भएर पर्यटकसमेत आउने भएकाले सहायता कक्षसँगै पर्यटक सहायता कक्षसमेत राखिएको सशस्त्र प्रहरी बल नेपाल नं. २ गण हेक्वा झापाका प्रमुख सशस्त्र प्रहरी उपरीक्षक कबिन्द्र राईले जानकारी दिए ।

चाडपर्वको बेला सीमा नाकाबाट आवतजावत गर्ने नागरिकहरूको सुरक्षा, सीमा क्षेत्रमा हुने अवैध गतिविधि, चोरी डकैती, लुटपाट जस्ता घटनाहरू हुन नदिन, अप्ठ्यारोमा परेका नागरिकलाई सहयोग गर्न हेल्प डेस्क राखिएको उनले बताए ।

दशैँ, तिहार तथा छठपर्व लगायतका चाडबाडका बेला सीमा नाकाबाट गन्तव्यतर्फ जाने आम नागरिकलाई सहज, सुरक्षित र सम्मानजनक ढंगबाट यात्रा पूरा गर्ने व्यवस्था मिलाउन तथा आपतविपद्मा परेका नागरिकको उद्धार कार्यमा सहयोग पुर्याउने अभिप्रायले कक्ष राखिएको उनले बताए ।