विराटनगर । असोज १० गतेदेखि १३ गतेसम्म परेको वर्षाले देशभरको जनजीवन प्रभावित भयो । २ सयभन्दा बढी मानिसको ज्यान गयो भने अझै दुई दर्जनभन्दा बढी मानिसहरु बेपत्ता छन् । 
मौसम पूर्वानुमान महाशाखाले क्षतिको आङ्कलनसहित रेड अलर्ट जारी गरेको थियो । तर, सरकारले पूर्व तयारी गरेको देखिएन । जसका कारण क्षति बढी भयो । सरकारले अझै पनि राहत र उद्धारको काम प्रभावकारी ढङ्गले गर्न सकेको छैन ।
यसैबिच महाशाखाले बुधवारदेखि फेरि दुई दिनसम्म पानी पर्ने पूर्वानुमान गरेको छ । कोशी प्रदेशमा आगामी बुधबार र बिहीबार फेरि लगातार पानी पर्ने भएपछि सर्वसाधारणमा चिन्ता छ । विगत तीन दिन अगाडि जस्तै पानी पर्ने र बाढी आउने पूर्वसूचना नभएपनि त्यस्तो अवस्था सिर्जना भए सरकारले थेग्न सक्ला ? प्रदेश सरकारको पूर्व तयारी के छ ? भन्ने विषयमा सर्वसाधारणको चासो छ ।
कोशी प्रदेशका आन्तरिक मामिला तथा कानूनमन्त्री लिलाबल्लभ अधिकारीले प्रदेश सरकारको क्षमताले भ्याएसम्म सबै तयारी गरिएको बताए । ‘हामीले पानी रहने बित्तिकै १३ गते नै चारैवटा सुरक्षा निकायका प्रमुख र मन्त्रालयका सचिवहरूको संयुक्त बैठक बोलाएर आ–आफ्नो तर्फबाट अलर्ट रहन, जनताको सेवामा समर्पित हुन निर्देशन जारी गरेका छौँ । मृतक परिवारलाई तुरुन्त राहत उपलब्ध गराउने, घाइतेको चाँडो उपचार गराउने, बेपत्ताको खोजी गर्ने र असुरक्षित स्थानबाट सुरक्षित स्थानमा स्थानान्तरण गराउने, विस्थापितहरूलाई वासस्थानको व्यवस्था र खाद्यान्नको व्यवस्थापन गर्ने निर्णय गरिसकेका छौँ,’ उनले भने, ‘प्रदेशले गर्नसक्ने जति गरेको छ । नसकेको ठाउँमा सङ्घसँग समन्वय गरेर गर्ने प्रयासमा लागेका छौँ ।’