बिर्तामोड । चाडपर्वको अवसरमा आयोजना गरिने विभिन्न महोत्सव, मेला तथा मनोरञ्जनात्मक कार्यक्रममा जुवाजन्य खेल खेलाउन नपाइने भएको छ । विहीबार बसेको झापा जिल्लाको विपद् व्यवस्थापन समितिले त्यस्तो निर्णय गरेको हो ।

प्रमुख जिल्ला अधिकारी बन्धुप्रसाद बास्तोलाको अध्यक्षतामा बसेको बैठकले यस अघि कार्यक्रमहरु आयोजना गर्दा आयोजकबीच विवाद, स्थानको विवाद, स्थानीय बासिन्दासँग विवाद, झै–झगडा, ठगी, लैङ्गीक हिंसा र जुवाजन्य गतिविधिहरू समेत हुने गरेको भन्दै आगामी दिनमा त्यस्तो गतिविधि हुन नदिने निर्णय गरेको हो ।

त्यस्ता कार्यक्रमहरु आयोजना गर्दा स्थानीय उत्पादनले बजार पाउने, स्थानीय कला संस्कृतिको संरक्षण हुने, रोजगारी सिर्जना हुने, जनचेतना अभिवृद्धि हुने खालका र स्वस्थ्य मनोरञ्जनात्मक विवादरहित मेला–महोत्सवमात्र आयोजना गर्न दिने निर्णय गरेको छ । त्यस्ता मेला महोत्सवहरु स्थानीय तहको सिफारिसमा अधिकतम १ दिनमात्र थप गर्न पाइने समेत निर्णय गरेको हो ।

जुवाजन्य गतिविधि हुन नदिन सुरक्षा निकायबाट कडाईका साथ अनुगमन गरि कारबाही गरिनेसमेत बैठकले निर्णय गरेको प्रमुख जिल्ला अधिकारी बास्तोलाले जानकारी दिए ।