बिर्तामोड । झापामा राष्ट्र, राष्ट्रियता, धर्म, संस्कृति र नागरिक बचाउ महाअभियानले आह्वान गरेको यातायात बन्द प्रभावहीन बनेको छ ।

बिहानैदेखि लामो तथा छोटो दुरीको सवारीसाधन निर्वाध सञ्चालन भइरहेको जिल्ला प्रहरी कार्यालय झापाले जनाएको छ । अप्रिय घटना हुन नदिन सुरक्षा व्यवस्था कडा बनाइएको जिप्रका झापाका सूचना अधिकारी प्रहरी नायव उपरीक्षक कृष्णकुमार चन्दले जानकारी दिए ।

बिएण्डसी मेडिकल कलेजका सञ्चालक दुर्गा प्रसाईंलाइ विद्युतीय कारोबार ऐन अन्तर्गत साइबर व्युरोको टोलीले आइतबार भक्तपुरबाट पक्राउ गरेपछि उनले सञ्चालन गरेको महाअभियानले झापामा यातायात बन्दको आह्वान गरेको थियो । सम्भावित दुर्घटना हुन नदिन प्रहरीले आइतबार बेलुका महाअभियानका संयोजक रामचन्द्र मैनाली र नागरिक प्रतिरक्षा बलका झापा इञ्चार्ज दुरेन राईलाई नियन्त्रणमा लिएको छ ।

यता महाअभियानका समर्थकहरुले दुईवटा भारतीय ट्रकमा आगजनी गरेका छन् । आइतबार राति ११ः१० बजे कनकाई –८ स्थित पूर्वपश्चिम राजमार्गको बिरिङ खोलाको पुलमा बिर्तामोडबाट सुरुङ्गातर्फ जाँदै गरेको युपी ५७ एटी ४४९३ नम्बरको मालबाहक ट्रकमा प्रसाईका समर्थकहरुले आगजनी गरेका छन् । प्लाइ बनाउन प्रयोग हुने कच्चा पदार्थ बोकेको ट्रकमा ६ वटा मोटरसाइकलमा आएका १०÷१२ जनाको समूहले ट्रकमा आगजनी गरी फरार भएका थिए । बिर्तामोड नगरपालिकाको दमकलको सहयोगमा इलाका प्रहरी कार्यालय बिर्तामोड र सुरुङ्गाबाट खटिएको संयुक्त प्रहरी टोलीले राति ११ः५५ बजे आगो पूर्ण रुपमा नियन्त्रणमा लिएको थियो । ट्रकमा भएको आगजनीबाट अगाडिको भागमा क्षति पुगेको छ ।

त्यस्तै पछाडिको भागमा समेत सामान्य क्षति पुगेको छ ।साथै, ट्रकमा भएको आगजनीबाट सोही ट्रकका चालक भारत सिलिगुडी बस्ने बर्ष ४० का कुमार महतो दाहिना हातको पाखुरामा जलेर घाइते भएका छन् । उनको बीएण्डसी अस्पतालमा उपचार भइरहेको छ ।

त्यस्तै प्रसाईका समर्थकहरुले बिहान २ः४५ बजे बिर्तामोड ६ गिरीबन्धु टी स्टेटस्थित पूर्वपश्चिम राजमार्गमा डब्लुबी ७३ इ ३०५६ नम्बरको अर्को भारतीय ट्रकमा समेत आगजनी गरेका छन् । सुनसरीको दुहबीबाट काँकडभिट्टातर्फ जाँदै गरेको खाली ट्रकलाई ५–६ जनाको समूहले आगजनी गरेका हुन् । ट्रकमा लागेको आगो बिर्तामोड नगरपालिकाको दमकलको सहयोगमा इलाका प्रहरी कार्यालय बिर्तामोडबाट खटिएको प्रहरी टोलीले नियन्त्रणमा लिएको थियो । आगलागीबाट ट्रकको अगाडिको भाग पूर्णरुपमा जलेर नष्ट भएको छ भने पछाडिको भागमा आंशिक क्षति पुगेको प्रहरीले जनाएको छ । साथै, आगलागीबाट ट्रकका चालक भारत इस्लामपुर बस्ने बर्ष ४० का पोदा रायको दाहिने हातको पाखुरा र ढाड जलेर घाइते भएकोमा उनलाई बीएण्डसी अस्पतालमा लगेर उपचार गरिएको थियो । चालक राय भारतमै उपचार गर्ने भन्दै भारततर्फ गएको बिर्तामोड प्रहरीका डीएसपी प्रकाश विष्टले बताए ।

त्यसयता कुनैपनि अप्रिय घटना नभएको प्रहरीले जनाएको छ ।