बिर्तामोड । नेपाल पत्रकार महासंघको चुनाव आगामी असोज १२ गतेका लागि तय भएको छ । पटक पटक सारिएको निर्वाचन पछिल्लो पटक असोज १२ गतेका लागि तय गरिएको हो ।

प्रकाशित कार्यतालिका अनुसार भदौ २९ गते साँझ मतदाता नामावली प्रकाशन, असोज ४ गते बिहान १० बजेदेखि दिउँसो ३ बजेसम्म उम्मेदवारको मनोनयन दर्ता, असोज ४ गते साँझ ५ बजे उम्मेदवारको नामावली प्रकाशन हुने जनाइएको छ ।

त्यस्तै असोज ४ गते साँझ ५ बजेदेखि असोज ५ गते अपराह्न २ बजेसम्म उम्मेदवारमाथि दाबी विरोध, ४ गते साँझ ५ बजेदेखि असोज ५ गते ४ बजेसम्म उम्मेदवारले नाम फिर्ता लिने, असोज ५ गते ६ बजे उम्मेदवारको अन्तिम नामावली प्रकाशन, असोज १२ गते बिहान ९ बजेदेखि अपराह्न ४ बजेसम्म मतदान र १२ गते मतदान कार्य समाप्त भएपश्चात् मतगणना हुने जनाइएको छ ।

संस्थागत समिति, जिल्ला शाखा र प्रतिष्ठान शाखाको मनोनयन भने असोज १० गते विहान १० बजेदेखि ३ बजेसम्मका लागि तय गरिएको छ ।