बिर्तामोड । झापाको बिर्तामोड नगरपालिका वडा नम्बर ५ स्थित कान्तिपुर ड्राइभिङ सेन्टरको कम्पाउण्ड बाहिर मृत फेला परेकी महिलाको पहिचान खुल्न सकेको छैन । बसपार्क नजिकै रहेको ड्राइभिङ सेन्टरको टिनको कम्पाउण्डबाहिर उनको शव बेवारिसे अवस्थामा फेला परेको थियो ।

बुधबार करिब ५:३० बजे सो स्थानमा बेवारिसे शव रहेको भन्ने खबर प्रहरीलाई प्राप्त भएको इलाका प्रहरी कार्यालय अनारमनीका प्रमुख प्रहरी नायव उपरीक्षक प्रकाश विष्टले जानकारी दिए । करिब ४० बर्ष उमेरकी उक्त महिला सो स्थान वरपर हिड्डुल गर्ने र मादक पदार्थसमेत सेवन गर्ने गरेको स्थानीयको भनाई उदृत गर्दै प्रहरीले जानकारी दिएकोछ ।

उनको शव पोष्टमार्टमका लागि मेची प्रादेशिक अस्पताल भद्रपुर पठाइएको डीएसपी बिष्टले जानकारी दिए ।