बिर्तामोड । मोरङको सुन्दरहरैँचामा मृत अवस्थामा भेटिएका दुई बालिकाकी आमा बिर्तामोडमा फेला परेकी छन् । उनलाई प्रहरीले पक्राउ गरी मोरङ लगेको छ ।

आज बिहान उनी बिर्तामोडको सिटीसेन्टरबाट पक्राउ परेकी हुन् । भदौ १५ गते सुन्दरहरैँचा नगरपालिका–७ स्थित नारायण न्यौपानेको केराघारीभित्र धनकुटा घर भएका ३१ वर्षीय अर्जुन कार्कीका छोरीहरू ३ वर्षीया आइका कार्की र १ वर्षीया अर्पणा कार्की मृत अवस्थामा फेला परेपछि आमा अन्जना न्यौपाने कार्की फरार भएकी थिइन् । हिजो साँझ सिटीसेन्टरस्थित एक घरमा बास माग्दा घरधनीले बास दिएका थिएनन् । त्यसको जानकारी पाएर इलाका प्रहरी कार्यालय बेलबारी र इलाका प्रहरी कार्यालय बिर्तामोडको टोलीले खोजी गरेको थियो । तर, उनी राति भेटिइनन् ।

आज बिहान करिव ५ बजे सिटीसेन्टरमै बेलबारी प्रहरीको टोलीले उनलाई फेला पारी मोरङतर्फ लिएर गएको बिर्तामोडका डीएसपी प्रकाश विष्टले जानकारी दिए । ती दुई बालिकालाई विष खुवाएर हत्या गरिएको अवस्थामा फेला पारिएको थियो । मृतक बालबालिकाका बुवा अर्जुन प्रहरी नियन्त्रणमा छन् ।