बिर्तामोड । संविधान जारी भएको ९ बर्षपछि कोशी प्रदेशमा आमसञ्चार विधेयकको मस्यौदा तयार भएको छ । मंगलबार बिर्तामोडमा पहिलोपटक आमसञ्चार माध्यमलाई व्यवस्थापन गर्न बनेको विधेयकको मस्यौदामाथि छलफल भएको हो ।

कोशी प्रदेश आन्तरिक मामिला तथा कानून मन्त्रालयले नेपाल पत्रकार महासंघ कोशी प्रदेश तथा जिल्ला शाखा झापासँगको सहकार्यमा बिर्तामोडमा विधेयकको मस्यौदा उपर छलफल तथा सुझाव संकलन कार्यक्रम आयोजना गरेको छ । मुलुक संघीयतामा गएको लामो समयपछि आमसञ्चार माध्यमलाई नियमन गर्न प्रदेश सरकारले विधेयक अगाडी बढाएको हो । प्रदेश सरकारले तयार पारेको विधेयकको मस्यौदा मन्त्रालयका प्रवक्तासमेत रहेका उपसचिव विश्वदीप बेस्राले प्रस्तुत गरेका थिए ।

नेपाल पत्रकार महासंघ झापा शाखाको सभाहलमा आयोजित कार्यक्रममा झापाली पत्रकारहरुले आफ्ना सुझाव दिएका थिए । पत्रकार राजेन्द्र गौतमले विधेयकमा द्वीअर्थी, लैङ्गिक विभेद हुने खालका शब्द राख्न नहुने सुझाए । कार्यक्रममा लीलाराज झापाली, ज्ञानेन्द्र निरौला, इन्द्रजित मुखिया, मनकुमार गदाल, अर्जुन राजवंशीलगायतले आ–आफ्ना सुझाव राखेका थिए ।

कार्यक्रममा मन्त्रालयका निमित्त सचिव कमलबहादुर थापा, महासंघ झापाका पूर्व अध्यक्षहरु गोविन्दचन्द क्षेत्री, केशव आचार्य, भिम नेम्बाङ, तारामणी सापकोटा, वर्तमान अध्यक्ष एकराज गिरी, अग्रज पत्रकार दिपीन राईलगायतको उपस्थिती रहेको थियो । कार्यक्रम महासंघ झापाका सचिव डिकेश लामाले सञ्चालन गरेका थिए ।