बिर्तामोड । सामाजिक सञ्जालमा भाइरल भएका प्रकाश तामाङ ‘काले’ ले नागरिकता प्रमाणपत्र पाएका छन् । ‘हेर्ने कथा’ को ‘हराएका वर्ष’ मार्फत् ३५ वर्षपछि आफ्नो परिवार भेटेका तामाङले घर मै नागरिकता पाएका हुन् । 

भोजपुर षडानन्द नगरपालिका–१० छाप्लेगाउँ (साम्पाङ) स्थित उनको घरमै गएर नगरपालिकाका जनप्रतिनिधि र प्रशासनका अधिकारीले आइतबार उनलाई नेपाली नागरिकताको प्रमाणपत्र प्रदान गरेका हुन् ।

जिल्लाको षडानन्द नगरपालिकाका मेयर सुरेन्द्र उदास, वडाध्यक्ष प्रेमदोर्जी शेर्पा, प्रमुख प्रशासकीय अधिकृत मोहन चापागाईँ र इलाका प्रशासन कार्यालय दिङ्लाका प्रशासकीय अधिकृत विनोद भण्डारीले सरकारी प्रक्रिया अनुसार प्रकाशलाई ०९–०२–८१–००३५७ नम्बरको नागरिकता प्रमााणपत्र दिएका हुन् ।

लामो समयपछि घर फर्किएका तामाङले शुरुमा नागरिकताका लागि पहल गर्दा प्रमाण पुर्याएर आउनु भनिएको थियो तर उनको कथा सामाजिक सञ्जालमार्फत भाइरल बने पछि उनलाई अधिकारीहरुले घर मै नागरिकता पुर्याएका हुन् ।

प्रकाशको परिवार अरु कै जग्गामा बसोबास गरिरहेको भन्दै भोजपुरका सांसद तथा पूर्वमन्त्री सुदन किँरातीले घर बनाइदिने भएका छन् ।