बिर्तामोड । अस्पतालबाट कैदी फरार भएपछि प्रहरीले खोजतलास तीब्र बनाएको छ । इलाका प्रहरी कार्यालय अनारमनीका थुनुवा बिर्तासिटी अस्पतालबाट फरार भएपछि प्रहरीले खोजतलास तीब्र बनाएको जनाएको हो ।

दमक नगरपालिका वडा नम्बर ३ भुटानी शरणार्थी सेक्टर जी थ्री भई हाल बिर्तामोड १ मा डेरा गरी बस्ने २५ वर्षीय बिशाल राई हतकडी फुस्काई फरार भएका हुन् । कैदी फरार भएपछि प्रहरीले उनको खोजीमा चारै तिर प्रहरी खटाउनुका साथै हाइवे चेकिङलाई समेत कडा गरिएको इप्रका अनारमनीका प्रमुख प्रहरी नायव उपरीक्षक प्रकाश विष्टले जानकारी दिए ।

मंगलबार दिउँसो ४ बजे पेट दुख्ने समस्या भएपछि राईलाई बिर्तामोडस्थित बिर्तासिटी अस्पतालमा भर्ना गरिएको थियो । राती करिब ३ बजेतिर उनको निगरानीका लागि खटिएका प्रहरी शौचालय गएको मौका छोपी हत्कडी फुस्काएर राई फरार भएको प्रहरीले जनाएको छ ।

राई भदौ २ गते राति अन्दाजी साढे ९ बजे बिर्तामोड नगरपालिका वडा नम्बर १ पश्चिम बस स्टेण्डबाट पक्राउ परेका थिए । शंकास्पद अवस्थामा हिडडुल गरिरहेको अवस्थामा राईलाई इलाका प्रहरी कार्यालय बिर्तामोडबाट खटिएको टोलीले  चेकजाँच गर्दा उनको साथबाट प्लाष्टिकसहित १ ग्राम ४४ मिलिग्राम ब्राउनसुगर फेला परेको थियो ।

इलाका प्रहरी कार्यालय बिर्तामोडको हिरासतमा राखी ५ दिन म्याद थप गरी उनीमाथि अनुसन्धान भइरहेको थियो ।