बिर्तामोड । झापाको बिर्तामोड-९ स्थित गरामनीमा स्थापना गरिएको रूपनारायण-पवित्रा प्रसाई स्मृति प्रतिष्ठानद्वारा ५ जना सम्मानित भएका छन् । शनिबार प्रतिष्ठानको चौथो स्मृति सभाको अवसरमा उनीहरुलाई नगद पुरस्कार सहित सम्मान गरिएको हो ।

आदर्श बुहारी सम्मानबाट बिर्तामोड-९ निवासी मिना आचार्य, अशक्त सहयोग समिर राजवंशी, क्यान्सर पीडित फगि माया पाठक, प्यारालाइसिसबाट पीडित राजेन्द्र भण्डारी र जेहनदार विद्यार्थी सम्मानबाट दुर्गा मावि कक्षा ८ मा अध्ययनरत छात्रा लीला बुढाथोकीलाई जनही ५ हजार नगद पुरस्कारसहित सम्मानपत्र प्रदान गरिएको थियो ।

अमेरिकामा बसोबास गर्दै आएका छोराबुहारी नन्दिकेशर प्रसाई र सरिता प्रसाईले आफ्ना मातापिता को नाममा स्थापना गरेको उक्त प्रतिष्ठानले हरेक वर्ष विभिन्न व्यक्तित्वहरूलाई आर्थिक सहयोगसहित सम्मान गर्ने गरेको छ ।

यसैगरी प्रतिष्ठानले प्रसाई ट्रस्ट कल्याणकारी कोष झापालाई  १ लाख रुपैँया प्रदान गरेको छ । प्रतिष्ठानका संस्थापक अध्यक्ष कमल संग्रौलाको अध्यक्षतामा सम्पन्न स्मृति सभामा प्रमुख अतिथि पूर्व संस्कृति मन्त्री खगेन्द्र प्रसाईले प्रतिष्ठानमार्फत समाजमा रहेका विभिन्न समस्याबा पिडित व्यक्तिहरुलाई सम्मान गरेर प्रशंसनीय काम गरेको बताए । कार्यक्रममा अक्षयकोष सञ्चालक समितिका अध्यक्ष तुलसीराम प्रसाइर्, दुर्गा माविका प्रधानाध्यापक लक्ष्मण शिवाकोटी, स्थानीय भद्रप्रसाद चुडाललगायतले शुभकामना दिएका थिए । कार्यक्रम लोकेन्द्र प्रसाईले सञ्चालन गरेका थिए ।