बिर्तामोड । झापाको भद्रपुर-७ निवासी एलिसा बुढाथोकी सिटौलाले आफ्ना श्रीमान प्रमोद सिटौलालाई केहि व्यक्तिहरुले बेपत्ता बनाएको भन्दै सकुशल घर फर्काइदिन आग्रह गरेकी छन् । टिकाराम नेपाल 'नेति’, स्वागत नेपाल र तुलसी उप्रेतीले सिटौलालाई घरबाटै लिएर गएको र हालसम्म सम्पर्क बाहिर रहेको भन्दै घर फर्काइदिन आग्रह गरेकी हुन् । 

बिहीबार सिटौला परिवारले बिर्तामोडमा पत्रकार सम्मेलन गरी साउन १६ गते विहान ८ः३० बजे सिटौलालाई घरबाटै कार्यालय पुर्याईदिने भन्दै अपहरण शैलिमा लगेर बेपत्ता बनाएको घटनाले परिवार विक्षिप्त भएको जनाएको छ । टिकाराम नेपाल 'नेति’ ,स्वागत नेपाल र अश्विन फर्माका सञ्चालक तुलसी उप्रेतीले बेपत्ता बनाएको भन्दै प्रमोदलाई सकुशल घर फर्काइदिन श्रीमती एलिसाले आग्रह गरिन् । सिटौंला परिवारले बैंकको कारोवारलाई लिएर मान्छे नै बेपत्ता बनाउने कार्य भएको भन्दै सरोकारवाला सबैलाई प्रमोदको खोजी गरिदिन आग्रह गरेको हो ।

गत साउन १६ गते बैंकमा भएको कारोवारको विषयलाई लिएर नेतिसहित तीन जनाले प्रमोदलाई घरबाट नै अपहरण शैलीमा बिर्तामोड लिएर आएको सिटौला परिवारको दावी छ । १६ गते विहान ५ः३४ बजे फोन गरी प्रमोदलाई नेतिसहितले  ३४९७ नम्वरको खैरो रंगको कारमा लिएर गएको, ७ः३० बजे घर लिएर आएको र  फेरी ८ः३० बजे कार्यालय छाडिदिने भन्दै लिएर गएको एलिसाले पत्रकार सम्मेलनमा जानकारी दिइन् । सोहि दिन १० बजेर १७ मिनेटमा वुहारी एलिसाको नम्वरमा फोन गर्दै नेतिले ९८५२६४०००० नम्बरको मोबाइलबाट फोन गरी धम्कीपुर्ण शैलीमा उल्टै प्रमोद घर आयो भन्दै सोधेको आमा पवित्राको भनाई छ । 

प्रमोदलाई बेपत्ता बनाएको विषयमा जिल्ला प्रहरी कार्यालय झापालाई पटक-पटक आग्रह गर्दासमेत प्रहरीले जाहेरी लिन नमानेको प्रमोदका मामा कृष्ण प्रसाईले बताए । उनले भने, 'यदि प्रमोदले गल्ती गरेको भए कारवाही हुनु पर्छ तर मानिसलाई विनाकारण वेपत्ता पार्नु त भएन नि ?’

वेपत्ता पारिएका भान्जाको खोजी गरिदिन प्रहरीसँग आग्रह गर्दा प्रहरीले निवेदन नै लिन नमान्नु खेदजनक भएको उनको भनाई छ ।

पत्रकार सम्मेलनमा बोल्दै सिटौला समाजका अध्यक्ष प्रेमप्रकाश सिटौलाले कानूनी राज्यमा दिनदहाडै ब्यक्ति वेपत्ता पार्नु र हाम्रो मानिस वेपत्ता बनाइयो भन्दै प्रहरीकहाँ निवेदन लिएर जाँदा निवेदन नै दर्ता नगर्नु आपत्तिजनक विषय भएको बताए ।

पत्रकारसमेत रहेका नेतीले श्रीमती मञ्जुकुमारी नेपालको नाममा प्रभु बैंक बिर्तामोड शाखामा एक करोड १७ लाख रुपैयाँ डिपोजिट गरेको र सो रकम हिनामिना भएको दावी गर्दै आएका छन् । तर, प्रभु बैंकले मञ्जुकुमारी नेपालले रकम दावी गरिरहेको मुद्दती रसिद, व्यालेन्स सर्टिफिकेट र स्टेटमेन्ट अनाधिकृत रहेको बताउँदै आएको छ ।

बैंकले विज्ञप्ति जारी गर्दै उक्त मुद्दती रसिद, व्यालेन्स सर्टिफिकेट र स्टेटमेन्ट अनाधिकृत एवं नक्कली रहेको धारणा सार्वजनिक गरेको हो ।

यता जिल्ला प्रहरी कार्यालय झापाका प्रमुख प्रहरी उपरीक्षक मिलन केसीले भने प्रमोदको खोजी भइरहेको र देशभर सर्कुलर जारी गएको बताए ।