बिर्तामोड । बुधबार दिउँसो १:५४ बजे काठमाण्डौबाट रसुवाको स्याफ्रुबेसीका लागि उडेको एअर डाइनेस्टीको नाइनएन-एजेडी एअरबस हेलिकप्टर दुर्घटना हुँदा चार चिनियाँ पर्यटकसँगै क्याप्टेन अरुण मल्लले ज्यान गुमाए । नुवाकोटको शिवपुरी गाउँपालिका-७, सूर्यचौर जङ्गलमा भएको उक्त दुर्घटनामा क्याप्टेन मल्लसहित पाँचै जनाको मृत्यु भएको हो ।

बुधबार ज्यान गुमाएका क्याप्टेन मल्ल हेलिकोप्टर उडानमा निकै अनुभवी र पोख्त पाइलटका रूपमा चिनिन्थे । मल्लले यसअघि नै दुई पटक हेलिकप्टर दुर्घटनामा परी मृत्युसँग साक्षात्कार गरेका थिए ।

पहिलो घटना

मल्लले पहिलो पटक २०७० असोज १० गते बिहान ८ बजेर २० मिनेट जाँदा सोलुखुम्बुकै लुक्लामा मृत्युलाई पराजित गरेका थिए । दुई यात्रु लिएर तेञ्जिङ हिलारी विमानस्थलको हेलिप्याडमा ल्याण्ड गर्न खोज्दा मल्लले उडाएको हेलिकप्टर विमानस्थलको तारबारमा ठोक्किएको थियो ।

त्यतिखेर मल्लले डाइनेस्टी हेलिसर्भिसेसको नाइनएन-एइएक्स हेलिकप्टर उडाएका थिए । उक्त दुर्घटनामा दुई यात्रु घाइते भएका थिए भने क्याप्टेन अरुण र सोनाम छिरिङ शेर्पाको सकुशल उद्दार भएको थियो ।

दोस्रो घटना

क्याप्टेन मल्ल दोस्रो पटक २०७९ चैत २९ गते हवाई उडानकै क्रममा मृत्युमाथि हावी हुन सफल भएका थिए । आज नुवाकोट सूर्यचौरमा दुर्घटना भएकै हेलिकोप्टर त्यस दिन ह्याम्स अस्पतालको छतमा अवतरण क्रममा दुर्घटनामा परेको थियो ।

उक्त दिन क्याप्टेन मल्लले त्रिभुवन विमानस्थलबाट उडाएर ह्याम्स अस्पतालको छतमा हेलिकोप्टर अवतरण गराउँदै थिए । बिरामी लिन चितवन भरतपुरतर्फ जान चिकित्सक टोली लिन उनी अस्पतालको हेलिप्याडमा पुगेका थिए । तर अवतरण गर्न खोज्दा हेलिकप्टर ठोक्किएर टेल रोटर भाँचिएको थियो । उक्त दुर्घटनामा कसैलाई पनि चोटपटकभने लागेन ।

हेलिकप्टर उडानमा ३५ वर्ष लामो अनुभव भएका क्याप्टेन मल्लले बुधबार दिउँसो भएको दुर्घटनामा भने मृत्युलाई हराउन सकेनन् । दुर्घटनामा क्याप्टेन मल्लसहित चिनियाँ पर्यटकहरू जुदाड टाङ (पुरुष), जिली (पुरुष), जेमिङ सी (पुरुष) र यियाद वु (महिला) ले ज्यान गुमाए ।