बिर्तामोड । पूर्वको व्यापारिक नगरी बिर्तामोडमा एक महिला महिनौँदेखि साइकलमा चिया बेच्दै हिँडेको भेटिन्छिन् । स्वदेशमै केही गर्न सकिन्छ भन्ने उद्देश्यले घरमा चिया पकाएर पसल पसलमा बेच्दै हिड्ने महिला हुन बिर्तामोडकी ३० बर्षीया मिना बस्नेत । मिनाले यसरी साइकलमा डुलाएर चिया बेच्न थालेको १३ महिना भयो ।

बेरोजगार भएर बस्नुभन्दा स्वदेशमै केहि नयाँ गर्न आफुले चिया बेच्न थालेको उनी बताउँछिन् । आफु चिया बनाउन पोख्त रहेको र धेरैले आफुले पकाएको चिया मन पराएकालेपनि यो व्यवसाय गर्न प्रेरित गरेको उनको भनाई छ ।

सुरुमा ग्राहक बनाउन गाह्रो भएको मिनाको तितो यथार्थ छ । ‘धेरैले विश्वास गर्दैनथे कि घरमा बनाएको चिया पसल पसलमा बेच्न सकिन्छ,’ उनले भनिन्, ‘तर, मैले निरन्तर मेहनत गरें र धीरे–धीरे मानिसहरूलाई मेरो चियाको स्वाद मन पर्न थाल्यो ।’

व्यवसायको क्रममा धेरै उतार चढाव आएको मिना बताउँछिन् । कतिपय दिनमा थकान महसुस भए पनि ग्राहकको प्रशंसा सुनेर काम गर्ने प्रेरणा मिलेको उनले बताइन् । अब भने ग्राहकहरूको संख्या बढ्दै गएको र उनीहरूको माया र समर्थनले नै सफलता मिल्दै गएकोमा मिना खुशी व्यक्त गर्छिन् ।

भविष्यमा चिया व्यवसायलाई अझ विस्तार गर्ने उनको सोच छ । ‘ठूला होटेल र रेस्टुराँहरूसँग पनि सम्पर्क गरी मेरो चिया सप्लाई गर्न चाहन्छु । साथै, चिया बनाउन नयाँ नयाँ रेसिपीहरू पनि सिक्दैछु,’ उनले भनिन् ।

अन्य दिदीबहिनीहरुलाइ  मेहनत र दृढ संकल्पले सफलता प्राप्त गर्न सकिने उनको सुझाव छ । सुरुवातमा चुनौती आउन सक्छ,  तर कामलाई निरन्तरता दिएमा सफलता मिल्ने उनी बताउँछिन् ।