रत्ननगर । चितवनको भरतपुर-२९ सिमलतालमा शुक्रबार बिहान गएको पहिराले बगाएर बेपत्ता भएकामध्ये १३ जनाको शव फेला परेको छ । सो मध्ये नवलपुरमा मात्रै नौवटा शव भटिएका छन् ।

हालसम्म १३ मध्ये नवलपरासी (बर्दघाट-सुस्तापश्चिमपूर्व)मा नौ, चितवनमा तीन र नवलपरासी (बर्दघाट-सुस्तापश्चिम) मा एउटा शव भेटिएको प्रहरीले जनाएको छ ।

जिल्ला प्रहरी कार्यालय नवलपरासी (बर्दघाट-सुस्तापश्चिमपूर्व)का सूचना अधिकारी प्रहरी नायब उपरीक्षक बेदबहादुर पौडेलले सोमबार मात्रै जिल्लामा चारवटा शव भेटिएका जानकारी दिए ।

नवलपुरमा हालसम्म भेटिएका नौ शवमध्ये पाँचको पहिचान खुलेको र ती बेपत्ता बसका यात्रु रहेको पुष्टि भएको पौडेलले जानकारी दिए ।

सोमबार यहाँ चारवटा शव भेटिएका थिए, ती शवको पहिचान हुन सकेको छैन ।  शव पहिरोमा परेर बेपत्ता भएका यात्रुको हुनसक्ने भन्दै सोहीअनुसार अनुसन्धान अगाडि बढाइएको प्रहरी नायब उपरीक्षक पौडेलको भनाइ छ ब।

आज बिहान गण्डक ब्यारेज पुलमा भेटिएका दुई शवमध्ये एउटा करिब १९ वर्षीया महिला र अर्को करिब ३० वर्षीय पुरुष रहेका प्रहरीले जनाएको छ।

यस्तै आजै मध्यविन्दु-२ भुताहास्थित नारायणी नदीको टापुमा भेटिएको शव करिब ४५ वर्षीय पुरुषको तथा विनयी त्रिवेणी गाउँपालिका-७ गण्डक ब्यारेजको पुलमा करिब १३ वर्षीय बालकको रहेको पौडेलले जानकारी दिए ।

जिल्लाको गैँडाकोट-७ गैरीमा भेटिएका दुईवटा शवमध्ये एउटा सर्लाहीको बरहथवा नगरपालिका-३ का १९ वर्षीय रमित कसुर माझी र अर्को चितवनको माडी-१ का २२ वर्षीय विकास परियारको भएको पौडेलले बताए । माझीको शव बुवा रवीन्द्र कुसर माझीले तथा परियारको शव दाजु विजय परिवारले पहिचान गरेका थिए ।

माझी काठमाण्डौबाट रौतहट जाने गणपति डिलक्सको बागमती प्रदेश ०३-००१ ख- २४९५ र परियार वीरगञ्जबाट काडमाण्डौ जाँदै गरेको एन्जल डिलक्सको बागमती प्रदेश ०३-००६ख १५१६ नम्बरको बसमा सवार यात्रु भएको जनाइएको छ ।

शनिबार गैँडाकोट-७ गैरीमा भेटिएको अर्को शव भारतको बिहार राज्यस्थित बेतियाका ३० वर्षीय सजाद अन्सारी भएको पौडेलले जानकारी दिए । अन्सारी वीरगञ्जबाट काठमाण्डौ जाँदै गरेको एन्जल डिलक्सको बागमती प्रदेश ०३-००६ ख १५१६ नम्बरको बसमा सवार यात्रु भएको उनले बताए ।

यस्तै, आइतबार साँझ जिल्लाको विनयी त्रिवेणी गाउँपालिका-७ स्थित ब्यारेजको गण्डक नहरमा भेटिएका दुवै शवको सोमबार बिहान पहिचान भएको छ ।

गण्डक नहरमा भेटिएकामध्ये एउटा चितवनको भरतपुर-२२ का २३ वर्षीय सुदीप विक रहेको बुवा सोमबहादुर विकले पहिचान गरेका थिए । सुदीप वीरगञ्ज जाँदै गरेको एन्जल डिलक्सका यात्रु थिए ।

यसैगरी, अर्को शव रौटहटको जमुनामाई गाउँपालिका-४ का १७ वर्षीय राहुम मियाको भएको उनका बुवा इस्लम मियाले पहिचान गरेका छन् । मिया गणपति डिलक्समा काठमाण्डौबाट गौर जाँदै थिए।

पहिरोमा परी बेपत्ता भएकामध्ये चितवनतर्फ भारतको सीतामाडी बर्गिनियाका २८ वर्षीय ऋषिपाल साह, भारतकै सीतामाडी बेतियाका ३० वर्षीय जयप्रकाश ठाकुर रहेका छन् ।

आइतबार नवलपरासी (बर्दघाट-सुस्तापश्चिम) मा भेटिएको शव बाराको साविक विश्रामपुर गाविस-४ का ४३ वर्षीय परमानन्द पण्डितको भएको र अर्का करिब ३५ वर्षीय पुरुषको पहिचान हुन नसकेको जनाइएको छ ।

हालसम्म तीनवटा जिल्लामा भेटिएका १३ वटा शवमध्ये पाँचवटा शवको पहिचान हुन सकेको छैन । पहिचान खुलेका सबै शव चितवनको भरतपुर अस्पताल पठाइएको र बाँकी शवको पहिचान खुलेपछि भरतपुर पठाइने प्रहरी नायब उपरीक्षक पौडेलको भनाइ छ ।

सिमलताल पहिरोमा परेर हराएको वीरगञ्जबाट काठमाण्डौ जाँदै गरेको एन्जल डिलक्सको बसमा कम्तिमा २४ जना र काठमाण्डौबाट रौतहटको गौरतर्फ जाँदै गरेको गणपति डिलक्समा कम्तीमा २७ यात्रु रहेको चितवन प्रशासनले जनाएको छ ।

बसमा सवार यात्रुमध्ये तीनजना त्रिशूली नदीमा पौडी खेलेर बाँँच्न सफल भएका थिए ।