बिर्तामोड । झापाको शिवसताक्षी नगरपालिका वडा नम्बर २ निवासी नविन आचार्यको निधन भएको छ । असार १४ गते मोटरसाइकल दुर्घटनामा परि घाइते आचार्यको उपचारको क्रममा शनिबार साँझ निधन भएको हो ।

असार १४ गते साँझ साढे सात बजे कमल गाउँपालिका वडा नम्बर ५ साबित्रा चोकस्थित पूर्वपश्चिम लोकमार्गमा केर्खाबाट दमकतर्फ जाँदै गरेको प्र.१-०१-०१४ प ८९१४ नम्बरको मोटरसाईकले बाटो क्रस गर्दै गरेको कुकुरलाई ठक्कर दिई दुर्घटना हुँदा मोटरसाईकल चालक शिवसताक्षी नगरपालिका वडा नम्बर २ बस्ने बर्ष २६ को पदम बहादुर पौडेल र मोटरसाइकलको पछाडी सवार सोहि ठाउँ बस्ने बर्ष ४० को नबिन आचार्य घाइते भएका थिए । आचार्यको टाउकोमा चोट लागेर गम्भीर अवस्थामा उपचारको लागि दमकस्थित निम्स अस्पताल लगिएकोमा समान्य उपचार पश्चात थप उपचारको लागि बीएण्डसी अस्पताल ल्याई उपचाररत रहेको अवस्थामा शनिबार बेलुका ४ बजे मृत्यु भएको जिल्ला प्रहरी कार्यालय झापाले जनाएको छ ।

मोटरसाइकल चालक पौडेलको बाँया कुम्ममा चोट लागेको छ भने मध्यम अवस्थामा दमकस्थित निम्स अस्पतालमा उपचार भईरहेको प्रहरीले जनाएको छ ।