बिर्तामोड । भारतीय टेलिभिजन रियालिटी शो ‘इण्डियन आइडल सिजन १४’ बाट थप चर्चामा आएकी झापाली गायिका मेनुका पौडेल आज नेपाल आउने भएकिछन् ।

मेनुका पौडेल सोमबार १०:२५ बजे बागडुग्रा एयरपोर्टमा आइपुग्ने सप्तक संगीत विद्यालय बिर्तामोडका सञ्चालक सरोज वत्सले जानकारी दिए । पौडेलको स्वागतमा विभिन्न संघसंस्थाका प्रतिनिधीहरु काँकरभिट्टा पुग्ने वत्सले जानकारी दिए । पौडेललाई बाजागाजासहितको र्यालीले सप्तक संगीत विद्यालयमा ल्याइने र सम्मान गरिने कार्यक्रम रहेको उनले बताए । पौडेललाई हल्दिबारी गाउँपालिकाले समेत सम्मान गर्ने कार्यक्रम रहेको छ ।

उक्त चर्चित रियालिटी शोको टप आठ सहभागीबाट पौडेल बाहिरिएकीछन् । आइतबार साँझ प्रशारित कार्यक्रममा उनको अन्तिम प्रस्तुती रहेको थियो । उनले फिल्म बीस साल बादको हेमन्तकुमार र लता मंगेशकरले गाएको गीत गाउने क्रममा गीतको शब्दावली नै भुलेकी थिइन् । कल्भर म्याक्स इन्टरटेनमेन्ट प्रालिद्वारा सञ्चालित रियालिटी शो सोनी इन्टरटेनमेन्ट टेलिभिजनबाट कार्यक्रम प्रशारण हुने गरेको छ ।