बिर्तामोड । झापाको शिवसताक्षी–४ मा स्थापना गरिएको सौर्य ऊर्जा कम्पनी झापा इनर्जी लिमिटेडको माघ २३ गते उद्घाटन गरिने भएको छ । कम्पनीले आज पत्रकार सम्मेलन गरेर नेकपा एमालेका अध्यक्ष केपी ओलीले उद्घाटन गर्ने जानकारी दिएका हुन् ।

उद्घाटनका लागि सम्पूर्ण तयारी पूरा भइसकेको सञ्चालक सुवास भट्टराईले जानकारी दिए । उक्त परियोजनाबाट उत्पादित विद्युत परिक्षण पश्चात नेपाल विद्युत प्राधिकरणको बोलोचोक सबस्टेसनमा जोडिएको छ । परियोजनाबाट हाल निरन्तर उत्पादन भइरहेको उनले बताए । आयोजना र प्राधिकरणबीच २०७८ मंसिर १२ मै विद्युत खरिद, बिक्री प्रतियूनिट सात रुपैयाँ ३० पैसाका दरले गर्ने सम्झौता भएको थियो ।

नेकपा एमालेका सांसद एलपी साँवा लिम्बुको अगुवाईमा स्थापित परियोजनामा ८० करोड लगानी रहेको बताइएको छ । २७ विगाहा जमिनमा सोलार प्यानल तथा आवश्यक भौतिक संरचना निर्माण गरिएको छ । झापा चार वर्षअघि सुरु भएको सौर्य ऊर्जा परियोजनाको शिलान्यास २०७८ सालमा संविधान सभाका अध्यक्ष सुवास नेम्वाङले गरेका थिए । परियोजनाबाट मौसम सफा हुँदा १० मेघावाट विद्युत उत्पादन हुने बताइएको छ ।