बिर्तामोड । झापामा आज एकै दिन चार जना मृत फेला परेका छन् । जिल्लाका विभिन्न स्थानमा दुई जना महिला र दुई जना पुरुष मृत अवस्थामा फेला परेका हुन् ।

शिवसताक्षी नगरपालिका ११ मैनाचुली बस्ने अन्दाजी ७४ बर्षीया रमनमाया राई गाईको गोठमा झुण्डिएको अवस्थामा मृत फेला परेको जिल्ला प्रहरी कार्यालय झापाले जनाएको छ । राई पहिलादेखि नै डिप्रेशनको बिरामी भएको आफन्तको भनाइ उद्धृत गर्दै प्रहरीले जनाएको छ ।

त्यस्तै बाह्रदशी गाउँपालिका वडा नम्बर ७ घर भएका २० बर्षीय दिनेश चौधरी कनकाई नगरपालिका वडा नम्बर ३ स्थित सागर बिष्टको घरमा डेरा बस्ने गरेको र सोहि घरको कोठामा बिहान १० बजेतिर सिलिङ फेनमा झुण्डिएको अवस्थामा फेला परेको जिल्ला प्रहरी कार्यालय झापाका निमित्त सुचना अधिकारी प्रहरी निरीक्षक ढुण्डीराज गिरीले जानकारी दिए ।

दमक नगरपालिका वडा नम्बर ४ प्रतिभा टोल निवासी ६० बर्षीय रामचन्द्र न्यौपाने घरभित्र बाट ताला लगाएको अवस्थामा कोठामा मृत फेला परेको प्रहरी निरीक्षक गिरीले जानकारी दिए । उनी घरमा एक्लै बस्दै आएको र बिहान अबेर छिमेकीले बोलाउँदासमेत नउठेकाले प्रहरीलाई खबर गरेका थिए । अस्थायी प्रहरी चौकी ताराबारीबाट गएको प्रहरी टोलीले हेर्दा मुल गेटमा भित्रबाट ताला लगाएको र ढोकाको चुकुल नलगाई सुतेको अवस्थामा न्यौपानेलाई मृत फेला पारेका थिए ।

न्यौपानेको शव दमक अस्पतालमा पोष्टमार्टम गराई बुहारी हेमकला न्यौपानेको जिम्मा लगाइएको प्रहरीले जनाएको छ ।

यता सोमबार बिहान अर्जुनधारा नगरपालिका ६ स्थित व्याडमिन्टन कबर्ड हल नजिक माई नगरपालिका वडा नम्बर १ कलकत्ते निवासी ५० बर्षीया माया मगर शंकास्पद अवस्थामा मृत फेला परेकी थिइन् । मगरको टाउको चोट देखिएका कारण हत्या भएको हुनसक्ने भन्दै प्रदेश प्रहरीको टोलीसहित कुकुर झिकाएर अनुसन्धान गरिएको थियो । तर कुकुरले कुनै क्लु पत्ता लगाउन नसकेको प्रहरीले जनाएको छ । प्रहरीका अनुसार मृतकको शव पोष्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको छ । मगर बिर्तामोड–५ मा कोठा बस्दै आएकी थिइन् ।