बिर्तामोड । झापाको बिर्तामोड नगरपालिका वडा नम्बर ७ स्थित बेल्स मोडेल ईङ्गलिस बोडिङ्ग स्कुलमा ग्यास सिलिण्डर पड्कँदा दुई जना घाइते भएका छन् । एक जनाको अवस्था गम्भिर रहेको छ । 

मंगलबार बिहान १०ः२० बजे विद्यालयको १७औँ बार्षिकोत्सवमा बेलुन फुलाउन प्रयोग गरिएको हाईड्रोजन ग्यासको सिलिण्डर पड्किएको जिल्ला प्रहरी कार्यालय झापाका निमित्त सुचना अधिकारी प्रहरी निरीक्षक ढुण्डीराज गिरीले जानकारी दिए । सिलिण्डर पड्किएर भएको दुर्घटनामा परि पाटी डेकुरेसन सिलिगुढीबाट आएका भारतीय नागरिक अन्दाजी ५४ बर्षीय गणेश सहनीको कम्मर मुनीको दाहिने खुट्टा चुँडिएको प्रहरीले जनाएको छ ।

उनको अवस्था गम्भिर रहेको र उपचारका लागि बीएण्डसी अस्पताल लगिएको प्रहरीले जनाएको छ । सोहि विद्यालयमा कक्षा ९ मा अध्यनरत बिर्तामोड ७ का टीका तामाङको छोरी १५ बर्षीया कुसुम तामाङको कानमा समस्या आई उपचारको लागि सोही अस्पतालमा पठाईएको र अवस्था सामान्य रहेको प्रहरी निरीक्षक गिरीले जानकारी दिए ।