बिर्तामोड । शनिबार झापाको दुई छुट्टाछुट्टै स्थानमा भएको सवारी दुर्घटनामा परी दुई जनाको मृत्यु भएको छ । कमल गाउँपालिका–४, चुलाचुली मोडमा भएको दुर्घटनामा परी कनकाई ३ निवासी ७० बर्षीय रघुनाथ भट्टराई र शिवसताक्षीमा भएको दुर्घटनामा परी तत्काल नामथर वतन नखुलेका एक जनाको मृत्यु भएको हो ।

शनिबार दिउँसो ३ः५५ बजे पूर्व पश्चिम लोकमार्गमा पश्चिमबाट पूर्व गई बाटो क्रस गर्दै गरेको मे ६ प ३१५२ नम्बरको (१५० सीसी) को मोटरसाइकललाई सोहि दिशाबाट जाँदै गरेको प्र १–०१–०१६ प ८९९२ नम्बरको (१२५ सीसी) को मोटरसाइकलले ठक्कर दिई दुर्घटना हुँदा विपरित दिशाबाट आउदै गरेको प्र १–०१–०१६ प ७१४० नम्बरको (१२५ सीसी)को स्कुटर समेत आई ठक्कर खाई दुर्घटना भएको जिल्ला ट्राफिक प्रहरी कार्यालय झापाले जनाएको छ ।

दुर्घटनामा परि प्र १–०१–०१६ प ८९९२ नम्बरको मोटरसाइकलको पछाडी सवार भट्टराईको टाउकोमा चोट लागेर गम्भीर घाइते भएको र उपचारका लागि लाइफ लाइन अस्पताल दमक लैजाँदै गर्दा बाटैमा मृत्यु भएको प्रहरीले जनाएको छ । प्रहरीका अनुसार उक्त मोटरसाइकलका चालक कनकाई–५ निवासी ५३ बर्षीय चन्द्रप्रसाद भट्टराई प्रहरी चौकी केर्खाको नियन्त्रणमा रहेका छन् ।

मे ६ प ३१५२ नम्बरको मोटरसाइकल चालक कमल गाउँपालिका-२ बस्ने अन्दाजी ५५–६० बर्षका देवप्रसाद बजगाईको अनुहारमा सामान्य चोट लागेको र लाइफलाइन अस्पताल दमकमा प्राथमिक उपचार पश्चात बीएण्डसी अस्पताल पठाइएको छ ।

त्यस्तै तत्काल नामथर वतन नखुलेको प्र १–०१–०१६ प ७१४० नम्बरकोस्कुटर चालक उपचारका लागि गएको प्रहरीले जनाएको छ । तीन वटै सवारी साधन प्रहरी चौकी केर्खाको नियन्त्रणमा रहेको प्रहरीले जनाएको छ । 

यता शिवसताक्षी नगरपालिका–१० सैनिक चोकमा साँझ ६ः०० बजे भएको दुर्घटनामा परी एक जनाको मृत्यु भएको छ । सैनिक चौक स्थित पूर्व पश्चिम लोकमार्गमा पश्चिम बाट पुर्व तर्फ आउँदै गरेको बा १४ च ६६०३ नम्बरको कार र बिपरित दिशा बाट जाँदै गरेको मे १० प ७२१२ नम्बरको (१६० सिसि) को मोटरसाइकल एक आपसमा ठक्कर खाई दुर्घटना हुँदा मोटरसाइकलमा सवार तत्काल नामथर वतन नखुलेका एक जनाको मृत्यु भएको प्रहरीले जनाएको छ ।

उक्त दुर्घटनामा परि कार चालक बिर्तामोड–३ निवासी ५० बर्षीय अनिलकुमार शाह सामान्य घाइते भएको र कनकाई अस्पताल बिर्तामोडमा उपचार भइरहेको, सोहि ठाउँ बस्ने ५३ बर्षीय जयप्रकाश शाह र ४४ बर्षीय रञ्जन शाह सामान्य घाइते भएको र बिर्तासिटी अस्पतालमा उपचार भइरहेको र ५३ बर्षीय ललित शाह सामान्य घाइते भएको प्रहरीले जनाएको छ ।

मोटरसाइकलमा रहेका तत्काल नामथर वतन नखुलेको अन्दाजी बर्ष २५ को अनुप ढकालको शरिरको बिभिन्न भागमा चोट लागेको र बोल्न नसक्ने गम्भिर अवस्थामा बिर्तासिटी अस्पतालमा उपचार भइरहेको प्रहरीले जनाएको छ ।

दुवै सवारी साधन अस्थायी प्रहरी चौकी माइधारको नियन्त्रणमा रहेको छ ।