बिर्तामोड । झापा प्रहरीले विभिन्न मितिमा बेवारिसे अवस्थामा बरामद गरेका सवारी साधन शुक्रबार मेची भन्सार कार्यालयलाई बुझाएको छ । सवारी धनी सम्पर्कमा नआएपछि १९ लाख मुल्यका सवारी साधन आवश्यक कारबाहीका लागि प्रहरीले भन्सार कार्यालयको जिम्मा लगाएको हो ।

पुष १५ गते ४ बजे दमक नगरपालिका वडा नम्बर ४ स्थित महेन्द्र राजमार्गको दक्षिण किनारमा शंकास्पद रुपमा बेवारिसे अवस्थामा फेला परेको मे १ च २१७५ उल्लेख भएको सेतो रङको १३ लाख मुल्यकोे बुलेरो पिकअप, पुष १४ गते ८ बजे झापा भद्रपुर नगरपालिका वडा नम्बर ९ कारागार कार्यालय अगाडी घोडामारा देखि जिल्ला प्रशासन कार्यालय भद्रपुर झापा आवातजावत गर्ने सडक खण्डमा फेला परेको मे २ प १६५७ उल्लेख भएको रातो कालो रङको आरटिआर अपाची, को १३ प ३१५२ उल्लेख भएको कालोमा रातो रङको १५० सिसिको पल्सर र को ६ प ४५७८ नम्बर उल्लेख भएको रातोमा कालो रङको १५०  सिसिको  पल्सर सहित जम्मा दुई लाख ९० हजार बराबरको ३ वटा मोटरसाइकल र पुष १५ गते भद्रपुर गरपालिका वडा नम्बर ७ स्थित लेखनाथ चोकदेखि गार्मेन्ट चोकको पुर्व तर्फको किनारामा बेवारिसे अवस्थामा फेला परेको मे ६ प १७७३ उल्लेख भएको रातो सेतो सुपर स्प्लेण्डर, मे ७ प  ७०३४ उल्लेख भएको कालो सेतो रङको १५० सिसिको पल्सर र मे ११ प ६३३९ उल्लेख भएको रातोमा कालो रङको २२० सिसिको पल्सर सहित तीन लाख दश बराबरको ३ वटा मोटरसाइकल भन्सार कार्यालयको जिम्मा लगाएको जिल्ला प्रहरी कार्यालय झापाले जनाएको छ ।

लागू औषध ओसारपसार, चोरी निकासीका मालवस्तु ओसारपसारमा प्रयोग भएका सवारी साधन प्रहरीको निगरानीमा परेपछि बेवारिसे छाडेर चालक भाग्ने गरेका छन् । प्रहरीले त्यस्ता अपराधिक गतिविधीमा प्रयोग हुने सवारी साधन नियन्त्रणमा लिने गरेपनि मानिस भने पक्राउ पर्दैनन् ।