बिर्तामोड । पछिल्लो केहि दिन यता झापामा हात्तीको उपद्रो बढ्दो छ । हात्तीको उपद्रोका कारण मानिसको घर भत्किनुका साथै खाद्यान्न खाइ दिँदा ठूलो क्षति भइरहेको छ ।

हिजो राति जंगली हात्तीले झापाको बुद्धशान्तिमा तीनवटा घर भत्काएर क्षति पुर्याएको छ ।

सोमवार राति १२M५० बजे आएको हात्तीले बुद्धशान्ति गाउँपालिका वडा नम्बर ५ आयाबारी थारु गाउँमा क्षति गरेको हो । हात्तीले लुदा दनुवारको अन्दाजी १० मन धान खाएर र घरको टाटीबेरा भत्काएर अन्दाजी रु ३० हजार बराबरको क्षति गरेको छ भने दिपनारायण दनुवारको पनि अन्दाजी १० मन धान खाएर र घरको टाटीबेरा भत्काउँदा अन्दाजी रु ३० हजार बराबरको क्षति भएको छ । त्यस्तै महेन्द्र दनुवारको पनि अन्दाजी १० मन धानसहित घरको टाटीबेरा भत्काउँदा अन्दाजी रु ३० हजार बराबरको क्षति गरेको छ ।

सोही हात्तीले नागिनप्रसाद चौधरीको २ कठ्ठा जग्गामा लगाएको आलु, बैगुन, टमाटर, कोपी, केरा गरी अन्दाजी ५० हजार बराबरको क्षति गरेको प्रहरीले जनाएको छ ।

पीडितहरुले ईलाका प्रहरी कार्यालय बुधबारेमा हिजो साँझ निबेदनका साथ जानकारी गराएको जिल्ला प्रहरी कार्यालय झापाले जनाएको छ ।