बिर्तामोड । बिर्तामोड वडा नम्बर ४ स्थित मेघाबारी टोलबासीका लागि नेतृत्व विकास तालिम सम्पन्न गरिएको छ । सोमबार गोमेन्द्र कलेजमा एक दिने तालिम सम्पन्न भएको हो ।

टोलबासीहरुको नेतृत्व क्षमता विकास गर्ने उद्धेश्यले कार्यक्रम आयोजना गरिएको आयोजक संस्था श्री सिद्धिविनायक भजन किर्तन मण्डलीकी अध्यक्ष गीता पोखरेलले जानकरी दिइन् ।

कार्यक्रमका प्रमुख अतिथी बिर्तामोड नगर प्रमुख पवित्रा महतारा प्रसाईले नेतृत्व विकास हरेक नागरिकका लागि आवश्यक रहेको बताइन् । नेताको मात्र नेतृत्व विकास हुनु पर्छ भन्ने बुझाई गलत रहेको बताउँदै प्रसाईले सबै नागरिकको नेतृत्व विकास हुने हो भने समाजमा सकारात्मक सोँच विकास हुने र मुलुक समृद्ध हुने बताइन् । उनले मेघाबारीबासीको एकताको खुलेर प्रशंसा गरिन् । ‘मेघाबारीबासीले योजनाबद्ध ढंगले अघि सारेको योजना प्रशंसनीय छ,’ उनले भनिन्, ‘एउटा टोलबासीको एकताले यति ठूला योजना अघि सार्न सकिएको देखेर प्रभावित छु ।’ सिद्धिविनायक भजन किर्तन मण्डलीको अगुवाईमा मेघाबारीमा बहुउद्धेश्यीय सामुदायिक भवन र नगरमै पहिलो पटक कर्मयोग भवन निर्माण प्रक्रिया अगाडी बढेको छ । 

कार्यक्रमका विशिष्ठ अतिथी बिर्तामोड वडा नम्बर ४ का वडाध्यक्ष राहुल शर्माले टोलबासीको अग्रसरताले नै समाजमा छिटो विकास हुने बताए । नेतृत्व विकासले विकास निर्माणका काम लगायत प्रशासनिक काम गर्न सहज हुने धारणा व्यक्त गरे । अर्का अतिथी गोमेन्द्र महाविद्यालयका प्राचार्य डा. रुपक खनालले नेतृत्व विकास आफैमा महत्वपूर्ण विषय भएको बताए । मानिसले हरेक कार्य गर्न नेतृत्व क्षमताको विकास आवश्यक हुने बताए ।

भिमा शिवाकोटीले सहजीकरण गरेको कार्यक्रममा ६० जनाको सहभागिता रहेको थियो ।

मण्डलीका सहसचिव केशव उप्रेतीले स्वागत गरेको कार्यक्रम सचिव उमा भट्टराईले सञ्चालन गरेकी थिइन् ।