बिर्तामोड । बिर्तामोडमा प्रधान कार्यालय रहेको कर्णाली बचत तथा ऋण सहकारी संस्थाका सचिव भुपाल बस्नेतले भ्रष्टाचार गरेको भन्दै सदस्यहरुले कारबाहीका लागि उजुरी दिएका छन् ।

सचिव बस्नेतले कर्णालीले आयोजना गरेको स्वास्थ्य शिविरमा भ्रष्टाचार गरेको भन्दै छानबिन गरी पदबाट निस्काशनको माग सहित उनीहरुले उजुरी दिएका हुन् । एक सय बढी सदस्यहरुले सचिव बस्नेतलाई कारबाहीका लागि हस्ताक्षरसहित निवेदन दिएको एक उजुरीकर्ताले बताए ।

२०७९ जेठ २८ गते कचनकवल गाउँपालिकामा प्रदेश सांसद विकास कोषबाट प्राप्त आर्थिक सहयोगमा कर्णाली साकोसले स्वास्थ्य शिविर तथा सचेतना कार्यक्रम सम्पन्न गरेको थियो । कर्णाली साकोसको पथरीया सेवा केन्द्रमा कर कट्टी पश्चात प्राप्त नगद १ लाख ९७ हजार रुपैँया मध्ये १ लाख ३६ हजार ८२० रुपैँयाको हरहिसाब सचिव बस्नेतले असार २४ गते सेवा केन्द्रमा बुझाएको र बाँकी ६० हजार १८० रुपैँया संस्थालाई फिर्ता गर्नुको साटो बस्नेतले आफ्नो खातामा जम्मा गरेको पाइएको उजुरीमा उल्लेख छ ।

‘वित्तीय संस्थामा यस्तो आर्थिक अपचलन एकदमै निन्दनीय र भ्रष्टाचार हो भन्ने हामी सदस्यहरुको ठहर छ । अत सदस्यलाई झुक्याई सदस्यको नाममा संस्थाको नाममा आएको रकम यसरी अपचलन गर्ने आर्थिक अनुशासन नभएको व्यक्तिबाट संस्थामा सुशासन र इमान्दारिता कदापी नहुने हाम्रो बुझाई हो । तसर्थ यस्ता व्यक्तिहरुलाई संस्थाको कुनै पदमा बहाल रहने अधिकार नभएको हुँदा निज भुपाल बस्नेतलाई सचिव पदबाट यथाशिघ्र बर्खास्त गरी आर्थिक अनुशासनतर्फ संस्थालाई लैजान हुन हार्दिक अनुरोध गर्दछौँ,’ निवेदनमा उल्लेख छ ।

यस्ता आर्थिक अपराधलाई ढाकछोप गर्न खोजिए कानुनी उपचार खोजिनेसमेत निवेदनमा उल्लेख छ । सदस्यहरुले उजुरी दिएको र संस्थाले छानबिन गर्ने अध्यक्ष टसबहादुर प्रधानले बताए । उनले भने, ‘निवेदन आएको छ, हामी छानविन गर्ने पक्षमा छौँ,’ उनले भने, ‘त्यो कुरा साँचो हो रहेछ भने उहाँले सजाय भोग्नु पर्छ ।’