बिर्तामोड । झापामा ‘प्रथम बिर्तामोड जुत्ता चप्पल महोत्सव २०८०’ सञ्चालन हुने भएको छ । पुष ९ गतेदेखि बिर्तामोडको सिटी सेन्टरमा एक महिनासम्म महोत्सव सञ्चालन हुन लागेको हो ।

नेपालका आठ वटा जुत्ता चप्पल उत्पादकहरुले संयुक्त रुपमा महोत्सव सञ्चालन गर्न लागेको शनिबार आयोजित पत्रकार सम्मेलनमा जानकारी दिईयो । महोत्सवमा रोयल सुज, बीएफ डियर हिल सुज, क्रसरोड सुज, फस्टवाक सुज, स्मार्ट सुज, डीजे सुज, टुरिस्ट सुज र रन सुजका ब्राण्ड उपलब्ध हुनेछन् । ती कम्पनीहरुका १५ बढी ब्राण्डका तीन हजार बढी डिजाइनहरु महोत्सवमा उपलब्ध हुने रन सुजका प्रबन्ध निर्देशक रुद्र न्यौपानेले जानकारी दिए । न्यौपानेका अनुसार सबै उमेर समूहका लागि जुत्ता चप्पल प्रदर्शनीमा राखिने छ । 

नेपाली उत्पादनको प्रबर्धन गर्ने, विदेशी कम्पनीका उत्पादनको चोरी पैठारीलाई निरुत्साहित गर्ने, नेपाली उत्पादनप्रति उपभोक्तालाई साक्षात्कार गराउने उद्धेश्यले महोत्सव आयोजना गर्न लागिएको न्यौपानेले बताए । महोत्सव अवधिभर २० देखि ५० प्रतिशतसम्म छुट उपलब्ध गराउने आयोजकले जनाएका छन् । 

महोत्सव पश्चात सिटी सेन्टर आठ वटै कम्पनीले संयुक्त रुपमा शो रुम सञ्चालन गर्ने न्यौपानेले जानकारी दिए ।