बिर्तामोड । झापाको बिर्तामोडमा कोशी प्रदेशका दलित तथा आदिवासी जनजाती गैरसरकारी संस्थाहरुको क्षमता अभिवृद्धि तालिम शुरु भएको छ । बिहीबार र शुक्रबार दुई दिन चल्ने तालिम अर्जुनधारा–११ स्थित नयाँ बसपार्कको होटल अर्किडमा शुरु भएको हो ।

उद्घाटन कार्यक्रममा बोल्दै  प्रतिनिधीसभाका सांसद हर्कमाया विश्वकर्माले नेपालमा संविधानले छुवाछुत मुक्त घोषणा गरेको यतिका बर्ष भइसक्दा पनि गाउँमा भने छुवाछुत यथावत रहेको बताइन् । सामाजिक क्षेत्रमा काम गर्ने गैर सरकारी संस्थाहरुले सामाजिक विभेद हटाउने कार्यमा प्रभावकारी भूमिका खेल्नु पर्ने बताइन् । गैससहरुले समाजमा कसरी काम गरिरहेको छ र ती कामहरु कति परिणाममुखी भयो भनेर अडिट गर्नुपर्ने औँल्याइन । सरकारले गैससहरुमार्फत ठूलो लगानी गरेपनि त्यस अनुरुप उपलब्धि हुन नसकेको बताइन् । गाउँ गाउँमा गैससहरुले दलित, जनजाति तथा आदिबासीको क्षेत्रमा काम गरेपनि उनीहरुको नेतृत्व विकास गरेर राज्यको नेतृत्व गर्ने ठाउँमा पुर्याउन नसकेको भन्दै गुनासो गरिन् । सामाजिक संघसंस्थाहरुमा ३३ प्रतिशत महिला सहभागिता गराउने बिषयमा गैससहरुले बहस चलाउनु पर्नेमा उनले जोड दिइन् ।

कार्यक्रमका अतिथी गैर सरकारी संस्था महासंघ कोशी प्रदेशका इञ्चार्ज छविलाल खतिवडाले गैससहरुलाई राज्यले उपेक्षा गरेको बताए । बिषम परिस्थितीमा राज्यले कर छुट लगायतको बिषयमा सोचिदिन उनले आग्रह गरे ।

जिल्लामा कार्यरत गैर सरकारी संस्थाहरुको क्षमता अभिवृद्धिका लागि तालिम आयोजना गरिएको आयोजक संस्था लिडरसिप एकेडेमी नेपाल (लेन)का वरिष्ठ कार्यक्रम प्रबन्धक प्रभाकर प्रधानले जानकारी दिए ।

तालिममा कोशी प्रदेशका ताप्लेजुङ र ओखलढुंगा बाहेक १२ जिल्लाबाट २४ जना प्रतिनिधी सहभागी रहेका छन् ।

तालिम अवधिभर प्रस्ताव लेखन, कार्यक्रम योजना र कार्यान्वयन, वित्तीय व्यवस्थापन र बजेट, नेतृत्व विकास र वकालत सीपका बारेमा प्रशिक्षण दिइने आयोजकले जनाएको छ । जय तिम्सिना, सोमराज ढकाल र राजन न्यौपानेले तालिमलाई सहजीकरण गर्ने छन् ।

लेनका वरिष्ठ कार्यक्रम प्रबन्धक प्रधानको अध्यक्षतामा सम्पन्न उद्घाटन कार्यक्रममा गैसस महासंघ झापाका अध्यक्ष कृष्ण दंगालको उपस्थिती रहेको थियो । सहभागीलाई लेनकी कार्यक्रम अधिकृत सबिना बडेले स्वागत गरेको कार्यक्रम सञ्चारकर्मी भिमा शिवाकोटीले सञ्चालन गरेकी थिइन् ।