बिर्तामोड । झापा निर्वाचन क्षेत्र नम्बर २ का किसानलाई सहयोग गर्न चिनियाँ प्राविधिक झापा आएका छन् । पशुपालन र मत्स्य पालनमा संलग्न किसानलाई प्राविधिक रुपमा सहयोग गर्न उनीहरु आएका हुन् ।

साउथ एशिया सेन्टर फर साउथ–साउथ कोअपरेसन फर पोभर्टी एलिभेसनमार्फत उनीहरु नेपाल आएका हुन् । आज काठमाण्डौस्थित चिनियाँ राजदुतावासका कर्मचारी चाउ हाउसहित आएका ती कृषि विज्ञहरुले बिर्तामोड ६,७ र ८ का कृषकहरुसँग अन्तरक्रिया गरेका छन् । उनीहरुले कृषकहरुले भोग्नु परेको समस्याका बारेमा जिज्ञासा राख्नुका साथै वडा नम्बर ७ को एउटा माछा फार्म र एउटा गाई फार्मको स्थलगत अवलोकन गरेको वडा नम्बर ७ का वडाध्यक्ष अविरलकृष्ण खरेलले जानकारी दिए ।

पहिलो चरणमा मत्स्य पालन र दुग्ध उत्पादनमा आवद्ध किसानलाई सहयोग गर्ने प्रतिनिधीसभाका सभामुख देवराज घिमिरेको सचिवालयले जनाएको छ । क्षेत्र नम्बर २ लाई ६ वटा क्लस्टरमा बाँडेर काम गरिने निर्वाचन क्षेत्र नम्बर २ का नेकपा एमालेका संयोजक बद्री भट्टराईले जानकारी दिए । उक्त क्लस्टरहरुमा बिर्तामोडको वडा नम्बर २,३ र ९ एउटा, ६,७ र ८ एउटा, अर्जुनधारा ८,९,१० र ११ एउटा, अर्जुनधारा १,२,३,४,७ एउटा, कनकाई ८,९ र अर्जुनधारा ५ लाई एउटा क्लस्टरमा विभाजन गरिएको छ ।

पाइलट प्रोजेक्टको रुपमा स्थानीय बीउलाई प्रबर्धन गरिने बताइएको छ । क्रमशः उनीहरुले धान, बाँस, मासु, सुपारी, फलफुल खेतीमा समेत सहयोग गर्ने संयोजक भट्टराईले जानकारी दिए ।

अन्तरक्रिया कार्यक्रममा बिर्तामोड नगरपालिकाका नगरप्रमुख पवित्रा महतारा प्रसाई, उपप्रमुख नगेन्द्रप्रसाद संग्रौला, नेकपा एमाले बिर्तामोड नगर अध्यक्ष सुवास भट्टराई, सभामुख घिमिरेका स्वकीय सचिव केशव ढुंगेल, प्रदेश सांसद एकराज कार्कीलगायत सहभागि थिए ।