बिर्तामोड । झापाको बिर्तामोड–५ कि क्यान्सर पिडीत महिला कुसुम आले मगरलाई व्यवसायीहरुले आर्थिक सहयोग  उपलब्ध गराएका छन् । बिर्तामोड उद्योग वाणिज्य संघका वरिष्ठ उपाध्यक्ष राजु न्यौपाने र शितल मिनी मार्केटका व्यवसायी कुमार निरौलाको अगुवाईमा व्यवसायीहरुले उनलाई आर्थिक सहयोग गरेका हुन् । 

मगर पाठेघरको क्यान्सरबाट पिडीत छिन् । एकल महिलासमेत रहेकी क्यान्सर पिडीत मगरलाई उपचारमा आर्थिक अभाव भएपछि व्यवसायीहरुले १ लाख २३ हजार  ३ सय ४५ रुपैयाँ आर्थिक सहयोग गरेका हुन् ।

मिनी मार्केटमा आयोजित कार्यक्रमकाबीच उनलाई उपचारका लागि सहयोग रकम प्रदान गरिएको थियो । सामान्य चिया पसल सञ्चालन गर्दै आएकी मगरलाई क्यान्सर जस्तो प्राण घातक रोग लागेपछि उपचारमा आर्थिक अभाव भएको थियो । मगरलाई व्यवसायीहरुबाट संकलित ७६ हजार ३ सय ४५ रुपैयाँ र बीएण्डसी अस्पतालमा रहेको फार्मेसी मार्फत ४७ हजार रुपैयाँ सहयोग गरिएको हो ।

रकम हस्तान्तरणसँगै क्यान्सर रोगी मगरलाई सकेको सहयोग गरिदिन संघका बरिष्ठ उपाध्यक्ष न्यौपालेले सबैलाई आग्रह गरेका छन् । मगरको स्वास्थ्यमा गत भदौ महिनादेखि समस्या देखिएको थियो । एक महिना अघि स्वास्थ्य परीक्षण गर्दा पाठेघरमा क्यान्सर भएको पत्ता लागेको मगरको भनाई छ ।

‘आफूसँग उपचारका लागि रकम नभएको र उपचारका लागि झण्डै ५ लाख रुपैयाँ लाग्ने भएपछि सबैसँग आर्थिक सहयोगका लागि अपिल गरेकी हुँ’ मगरले भनिन्, ‘नबिल बैंकमा रहेको मेरो खाता नम्वर १८९१००१७५००३१५ मा सहयोग गरिदिन म सबैलाई आग्रह गर्छु ।’

सहयोग रकम ग्रहण गर्दै उनले मनका धनिले सहयोग गरे उनको उपचारमा सहयोग पुग्ने बताइन् । मगरका एक छोरा र एक छोरी रहेका छन् । मगरका श्रीमानको केही वर्ष अघि निधन भएको बताइएको छ ।