बिर्तामोड । झापाको बिर्तामोडमा आयोजित एक कार्यक्रमका बिच पूर्वी गर्जन पत्रिकाको सार्वजनिकीकरण गरिएको छ । नेपाल कम्युनिष्ट पार्टीको विचार र कार्यक्रम प्रवाह गर्ने माध्यमको रुपमा प्रकाशित पूर्वी गर्जन सार्वजनिक गरिएको हो ।

पूर्वी गर्जन मिडिया प्रालिद्वारा प्रकाशित पत्रिकाले मुलत राजनीतिक विषयलाई उठान गर्ने बताइएको छ । सुमन सिंह सी निर्देशक रहेको पत्रिकाको प्रविन अधिकारी सम्पादक रहेका छन् । पत्रिका यस अघि नै प्रकाशन भएको भएपनि पार्टीलाई प्रतिबन्ध लागेसँगै प्रकाशन बन्द भएको थियो । क्रान्तिलाई सफल बनाउन सञ्चारको महत्वपूर्ण भूमिका हुने भएकाले पत्रिका पुनः प्रकाशन शुरु गरिएको निर्देशक सुमन सिंह सीले बताए । पूर्वी गर्जनको अनलाईन संस्करण भने प्रकाशन भइरहेको थियो ।

पूर्वी गर्जनले अक्षयकोषको समेत आरम्भ गरेको छ । अक्षयकोषमार्फत बर्षेनी एक जना प्रगतिशिल पत्रकारलाई सम्मानित गरिने र यो बर्ष पत्रकार नरेन्द्र ढकाललाई सम्मानित गरिएको सम्पादक अधिकारीले बताए । ढकाललाई कार्यक्रमका प्रमुख अतिथी नेपाल कम्युनिष्ट पार्टीका स्थायी समिति सदस्य अनिल बिरहीले नगदसहित सम्मान पत्रले सम्मान गरेका थिए । ढकाल मिडिया एक्सन नेपालका प्रदेश संयोजक तथा स्वतन्त्र पत्रकार समाज झापाका अध्यक्ष हुन् । उनी पूर्वाञ्चल दैनिकमा आबद्ध छन् ।

पार्टीका मेची व्युरो इञ्चार्ज सुमन सिंह सीको अध्यक्षतामा सम्पन्न कार्यक्रममा नेकपा माओवादी केन्द्र झापाका संयोजक राजु आचार्य -अग्नी_, नेपाल पत्रकार महासंघका पूर्व केन्द्रीय सदस्य मोहन काजी, प्रदेश समिति सदस्य लीलाराज झापाली, झापा शाखाका अध्यक्ष एकराज गिरीलगायतले पत्रिकाको निरन्तरतासहित प्रगतीको शुभकामना दिएका थिए ।