बिर्तामोड । माटोमा लुकाएर काठ ढुवानी हुँदैछ भन्ने सुचनाका आधारमा प्रहरीले ट्याक्टर चेकजाँच गर्न खोज्दा घुस दिन खोज्ने व्यक्तिसहित काठ, ट्याक्टर र दुई जना व्यक्तिलाई पक्राउ गरेको छ । अर्जुनधारा नगरपालिका ५ बाँसबारीमा ट्याक्टरले माटोमा लुकाएर काठ लैजाँदै गरेको सुचनाका आधारमा प्रहरीले चेकजाँच गर्ने क्रममा घुस दिन खोज्ने अर्जुनधारा ३ का ४० बर्षीय कृष्ण श्रेष्ठ र ३८ बर्षीय रोहित घतानीलाई प्रहरीले पक्राउ गरेको छ ।

शनिार बिहान ५M५० बजे सो सडक खण्डमा उत्तरबाट दक्षिण तर्फ जाँदै गरेको मे १ त ८०५ नम्बरको ट्याक्टरसहित प्रहरीले २ लाख ७० हजार मुल्य बराबरको ५४=५ क्युफिट सखुवाको चिरान काठ बरामद गरेको हो । ट्याक्टर चेकजाँज गर्ने क्रममा काठ बरामद भएपछि उनीहरुले प्रहरीलाई ९५ हजार रुपैँया घुस दिन खोजेको जिल्ला प्रहरी कार्यालय झापाका सूचना अधिकारी प्रहरी नायव उपरीक्षक खगेन्द्रप्रसाद रिजालले जानकारी दिए ।

गोप्य सुचनाका आधारमा शनिश्चरे प्रहरी चौकीबाट प्रहरी नायव निरीक्षक कुमार खड्काको नेतृत्वमा गएको टोलीले ट्याक्टर चेकजाँच गर्दा माटो भित्र लुकाएर ढुवानी गरिरहेको अवस्थामा ५ फिट लम्बाईको २ थान, ६ फिट लम्बाईको ११ थान, ७ फिट लम्बाईको १९ थान र ८ फिट लम्बाईको २० थान चिरान काठ बरामद गरेको जिल्ला प्रहरी कार्यालय झापाले जनाएको छ ।

बरामद भएको काठसहित ट्याक्टर र पक्राउ परेका व्यक्तिहरुलाई इलाका प्रहरी कार्यालय अनारमनीमा राखेर अनुसन्धान भइरहेको र डिभिजन वन कार्यालयमा पठाउने तयारी गरिएको प्रहरीले जनाएको छ । स्रोतका अनुसार गोप्य सुचना पाएको प्रहरीले रातभरको प्रयासबाट बिहान ट्याक्टर फेला पार्न सफल भएको थियो ।