बिर्तामोड । विशेष अदालतले कैद र जरिवाना तोकेपछि फरार भएका यातायात व्यवस्था कार्यालय कोशी इटहरीका तत्कालीन प्रमुखसहित पाँच जनालाई मोरङ प्रहरीले पक्राउ गरेर अदालतमा उपस्थित गराएको छ । अदालतले उनीहरूलाई कैद सजाय भुक्तानीका लागि मंगलबार मोरङ कारागार पठाएको छ ।

पक्राउ पर्नेमा तत्कालीन कार्यालय प्रमुख उपसचिव नयराज नेपाल, लेखापाल मणीराम दाहाल, कुमारबहादुर कटुवाल, टिकाराम अधिकारी र देवराज नेपाल रहेको मोरङ प्रहरीका प्रवक्ता डिएसपी रन्जनकुमार दाहालले बताए ।

प्रहरीले लेखापाल मणीराम दाहाल, कुमारबहादुर कटुवाल, टिकाराम अधिकारी र देवराज नेपाललाई पक्राउ गरेको मोरङ प्रहरीका प्रवक्ता डिएसी रन्जनकुमार दाहालले जानकारी दिए । विशेष अदालत काठमाडौंले २०७९ चैत ८ गते उनीहरूलाई भ्रष्टाचार (राजश्व रकम हिनामिना) कसुरमा दोषी ठहर गरेको थियो ।

तत्कालीन लेखापाल दाहालललाई ७ वर्ष ११ महिना २३ दिन कैद र ४ करोड ३४ लाख ५ हजार ५९४ जरिवानाको फैसला सुनाएको थियो । यस्तै, नेपालललाई ८ वर्ष कैद र १२ करोड ३५ लाख २९ हजार ३४२ जरिवाना, कटुवालललाई ६ वर्ष कैद र १ करोड १ लाख ६५ हजार ८१२ जरिवाना, अधिकारीलाई ९ वर्ष कैद र २८ करोड १५ लाख ९३ हजार ८८४ रुपैयाँ जरिवाना तथा देवराज नेपाललाई ८ वर्ष ६ महिना कैद र २२ करोड ४५ लाख २७ हजार ६७६ रुपैयाँ जरिवानाको फैसला गरेको थियो ।

यातायात व्यवस्था कार्यालय सबारी, कोशी इटहरीले आर्थिक वर्ष २०६९/०७० र २०७०/०७१ मा भएको ८ करोड ९६ लाख १७ हजार ६२ रुपैयाँ राजस्व हिनामिना र आर्थिक वर्ष २०७१/०७२, २०७२/०७३ र २०७३/०७४ फागुन मसान्तसम्ममा भएको ६१ करोड २१ लाख २८ हजार ५५५ रुपैयाँ राजस्व हिनामिनाको विषयमा अख्तियार दुरुपयोग अनुसन्धान आयोगले दुई मुद्दा विशेष अदालतमा दायर गरेको थियो ।