बिर्तामोड । लागूऔषधको कुलतमा फसेकाहरुलाई सचेतना कक्षा सम्पन्न भएको छ । जिल्ला प्रहरी कार्यालय झापाले उनीहरुलाई लागूऔषधको असर र प्रभावका बारेमा जानकारी गराएको हो ।

‘लागूऔषधको कुलतमा फसेकाहरुलाई मनोपरामर्श र पुनः सामाजिकीकरण अभियान २०८०’ अन्तर्गत आइतबार जिल्ला प्रहरी कार्यालय झापाका प्रहरी निरीक्षक ढुण्डीराज गिरी र प्रहरी नायव निरीक्षक सुवास मिश्रले सचेतना कक्षा सञ्चालन गरेको जिल्ला प्रहरी कार्यालय झापाले जनाएको छ । कार्यक्रममा लागूऔषधको असर, प्रभाव र कसुर सजायको बिषयमा डकुमेन्ट्री प्रस्तुत गरिएको थियो ।

पुन स्थापना सुधार केन्द्र काँकरभिट्टाका संचालकहरु संदिप थापा र भिम लुईटेलले उनीहरुको उत्प्रेरणा बढाएका थिए । कार्यक्रममा दुव्र्यसनीको सामूहिक प्रतिबद्धता ‘आइ डेयर नो ड्रग्स’मा सामूहिक प्रतिबद्धता जनाइएको थियो । कार्यक्रम जिप्रका झापाका प्रमुख प्रहरी उपरीक्षक दुर्गाराज रेग्मीको प्रमुख आतिथ्यमा सम्पन्न भएको थियो । 

जिप्रका झापाको सभाहलमा भएको कार्यक्रममा ४५ जना लागूऔषध प्रयोगकर्ताहरुको सहभागिता रहेको कार्यालयले जनाएको छ ।