बिर्तामोड । पूर्वराजा ज्ञानेन्द्र शाह शनिबार झापामा आयोजित एक कार्यक्रममा सहभागी भएका छन् । शाहले बिर्तामोड–१ स्थित इकम कलेजले निर्माण गरेको पृथ्वीनारायण शाहको सालिक अनावरण गरेका हुन् ।

शनिबार (आज) ईकम कलेजले आफ्नो प्राङ्गणमा निर्माण गरेको फाइबरको सालिक शाहले अनावरण गरेका हुन् । शाहले सालिक अनावरणसँगै ८ बर्षदेखि सञ्चालित उक्त कलेजको उद्घाटनसमेत गरेका थिए । ईकम कलेजले होटल म्यानेजमेन्ट, बिज्ञान र व्यवस्थापन संकायको कक्षा सञ्चालन गराउँदै आएको छ ।

कार्यक्रममा सहभागि हुन शाह शुक्रबार नै मेचीनगरमा रहेको होटल मेची क्राउनमा आएका थिए । मेची क्राउन होटलबाट राजावादी दलका कार्यकर्ताले स्कर्टिङ गरेर शाहलाई कार्यक्रम स्थलसम्म ल्याएका थिए । हजारौं मोटरसाइकलमा आएका राजावादी दलका कार्यकर्ताले शाहलाई स्कर्टिङ गरेका थिए । राप्रपाले शाह झापा आएको मौकामा स्वागत गर्ने भन्दै शक्ति प्रदर्शन गरेको छ । राप्रपाका अध्यक्ष राजेन्द्र लिङदेन पनि शाहसँगै कार्यक्रममा सहभागी भएका थिए । उनी आफै १५ दिनदेखि झापामा बसेर कार्यक्रमको तयारी गरेको राप्रपाका प्रवक्ता मोहन श्रेष्ठले जानकारी दिएका छन् ।

कलेज उद्घाटन, पृथ्वीनारायण शाहको सालिक अनावरणपछि शाहले कलेजले आयोजना गरेको सांस्कृतिक कार्यक्रम अवलोकन गरेका थिए । कार्यक्रममा आयोजकले नेपाली राष्ट्रगान भन्दै स्वदेश गित बजाएको थियो । ‘रातो र चन्द्र सुर्य’ बोलको स्वदेश गान कलेजका छात्रा प्रेरणा ओलीले गाएकी थिइन् ।

पछिल्लो समय राजावादी अभियान चलाइरहेका दुर्गा प्रसाईँले मधेस प्रदेशमा आयोजित एक कार्यक्रममा पुरानो राष्ट्रगान बजाएपछि विवाद उत्पन्न भएको थियो । आयोजकले सो विवाद यहाँ दोहोरिने सम्भावनालाई टार्दै स्वदेश गितलाई राष्ट्रगानको रुपमा प्रस्तुत गरेको थियो ।

कलेजका शिक्षकसमेत रहेका कार्यक्रमका उद्घोषक बालकृष्ण दाहालले सम्बोधनभरी राजषी भाषा र शैली प्रयोग गरेका थिए । पुर्वराजा ज्ञानेन्द्र शाहलाई दाहालसहितका वक्ताहरुले पटक–पटक ‘श्री ५ को सरकार, महाराजधिराज’ लगायतका बिशेषण प्रयोग गरेका थिए । कार्यक्रममा कलेजका प्रबन्ध निर्देशक आलोक कार्की तथा सञ्चालक निर्मल निरौलाले बोलेका थिए ।

शाहलाई हेर्न प्रदेशभरबाट हजारौं सर्वसाधारणको भिड लागेको थियो । भिडका कारण कार्यक्रम स्थलसम्म शाहलाई लैजाने क्रममा सुरक्षाकर्मीलाई हम्मे हम्मे परेको थियो । कार्यक्रम स्थलसम्मको लाइनमा ठेलमठेल हुँदा सहभागीहरुले दिग्दारी महशुर गरेका थिए । नेपाल प्रहरीका डिएसपी र शसस्त्र प्रहरीका इन्स्पेक्टरको टोलीले  कार्यक्रममा सुरक्षा दिएका थिए ।

कलेज प्राङ्गणमा गरिएको कार्यक्रममा सहभागीलाई भने गेट बाहिरै राखिएको थियो । कलेजको कम्पाउण्डभित्र जान नपाएपछि सहभागीहरुले चर्को असन्तुष्टी जनाएका थिए । टाढाबाट आएका उनीहरुले शाहलाई भेट्न नपाएपछि आयोजकको आलोचना गर्दै फर्किएका थिए ।

कार्यक्रममा शाह, राप्रपाका अध्यक्ष लिङदेन लगायत राजावादी दलका नेता कार्यकर्ता सहभागी भएपनि सम्बोधन भने गरेनन् ।

काठमाण्डौमा झापाका प्रसाईंले राजावादी आन्दोलन गरिरहेपनि शाह भने झापा आएका छन् । दुर्गा प्रसाईको कार्यक्रमलाई खास महत्व नदिइरहेका शाह लिङदेनको व्यवस्थापनमा हुने कार्यक्रममा सहभागिता जनाउन झापा आएका हुन् । प्रसाईँले तीनदिनदेखि लगातार काठमाण्डौमा ‘राजा ल्याउने’ भन्दै आन्दोलन गरिरहेका छन् । उनको आन्दोलनलाई पुर्वराजाको समर्थन रहने कतिपय राजनीतिक बिश्लेषकको अनुमान बिपरीत शाह भने लिङदेनको गृहजिल्ला झापा आएका हुन् ।

कार्यक्रम पश्चात पूर्वराजा शाह होटल मेची क्राउन नै फर्किएका छन् भने भोलि साँझ काठमाण्डौ फर्कने बताइएको छ ।