बिर्तामोड । झापाको भद्रपुर नगरपालिका–१ पृथ्वीनगरमा श्रीमान श्रीमती मृत फेला परेका छन् । स्थानीय ३६ वर्षीय सुवास लिम्बू र उनकी श्रीमती ३५ वर्षीया जुनिता लिम्बू मृत फेला परेका हुन् ।

जुनिता घरभित्र र सुवास घरनजिकैको रुखमा झुन्डिएको अवस्थामा फेला परेको प्रहरीले जनाएको छ । श्रीमती जुनिताको हत्या गरी सुवासले आत्महत्या गरेको हुनसक्ने जिल्ला प्रहरी कार्यालयका प्रवक्ता डीएसपी खगेन्द्रप्रसाद रिजालले बताए । जुनिताको खुट्टामा सामान्य चोट देखिएको र मृत्युको कारण पोष्टमार्टम रिपोर्टपछि थाहा हुने उनले बताए ।

सुवास झुण्डिएको रुखको फेदमा श्रीमती जुनिताको फोटो र सुसाइड नोटसमेत फेला परेको प्रवक्ता रिजालले जानकारी दिए । श्रीमतीको हत्यापछि आफूले आत्महत्या गरेको सुवासले सुसाइड नोटमा उल्लेख गरेको स्रोतले बताएको छ ।

सुसाइड नोटमा आफ्नो कारणले जुनिताको मृत्यु भएको र आफुपनि बाँच्न नसक्ने भन्दै बच्चाहरुको संरक्षण दाजुले गरिदिनु भनि सुवासले सुसाइड नोटमा उल्लेख गरेको बताइएको छ । उनीहरुको तीन नाबालक छोराछोरी रहेको प्रहरीले जनाएको छ ।

दुवैजनाले मादक पदार्थ सेवन गरी राति झगडा गरेका थिए । सुवासका दाजुलगायतले राति ११ बजे घरमा आएर उनीहरुको झगडा मिलाएका थिए । झगडा मिलाएर उनीहरु राति नै घर फर्किएको र त्यसपछि सो घटना भएको हुनसक्ने प्रहरीको अनुमान छ । घटनाको सम्बन्धमा अनुसन्धान भइरहेको डीएसपी रिजालले जानकारी दिए ।