बिर्तामोड । झापाको बिर्तामोड नगरपालिका वडा नम्बर २ चारपाने चोकमा शुक्रबार विहान गाडीको ठक्करबाट एक पैदल यात्रुको मृत्यु भएको छ । गाडीको ठक्करबाट स्थानीय ५५ बर्षीय गंगाप्रसाद राजवंशीको मृत्यु भएको हो ।

विहान ५:४५ बजे पूर्वबाट पश्चिम जाँदै गरेको प्र १–०१–००१ ज ३७६० नम्बरको इलेक्ट्रिक गाडीले पैदल यात्री राजवंशीलाई ठक्कर दिँदा राजवंशीको घटनास्थलमै मृत्यु भएको जिल्ला ट्राफिक प्रहरी कार्यालय झापाले जनाएको छ । प्रहरीका अनुसार शव पोष्टमार्टमका लागि मेची प्रादेशिक अस्पताल भद्रपुर पठाइएको छ ।

ठक्कर दिने गाडी र चालक देउमाई नगरपालिका वडा नम्बर ७ बस्ने ३० बर्षीय रमेश लिम्बूलाई इलाका प्रहरी कार्यालय अनारमनीले नियन्त्रणमा लिएर अनुसन्धान गरिरहेको प्रहरीले जनाएको छ ।