बिर्तामोड । झापाको अर्जुनधारा नगरपालिका वडा नम्बर १० र बुद्धशान्ति गाउँपालिका वडा नम्बर ३ को सिमानामा पर्ने दुई रिङ्गेमा आगलागीमा परि एक वृद्धाको मृत्यु भएको छ । बिहीबार राति साढे ९ बजे घरमा आगलागीहुँदा ७५ बर्षीया दिलकुमारी राईको जलेर मृत्यु भएको हो ।

आगलागीबाट दिलकुमारीका श्रीमान ७३ बर्षीय शिवकुमार राई घाइते भएको र अस्पतालमा उपचार भइरहेको स्थानीय बद्रीप्रसाद भण्डारीले जानकारी दिए । उनीहरुको सन्तान नभएको र घरमा दुई जनामात्र बस्ने गरेको उनले बताए । घरमा आगो लागेको थाहा पाएपछि स्थानीयहरु गएर आगो निभाएका थिए । आगो निभाई सकेपछि वृद्धदम्पतीको खोजी गर्दा शिवकुमारलाई घरबाट केहि पर खेतमा लडिरहेको स्थानीयले फेला पारेको भण्डारीले बताए । दिलकुमारी खोइ भनेर उनीहरुले सोध्दा घाइते शिवकुमारले मैन बत्ती बाल्दै थिइ भनेपछि घरभित्र खोजतलास गर्दा दिलकुमारीलाई मृत फेला परेको उनले बताए ।

आगलागीबाट करिब ७५ हजारको क्षति भएको प्रहरीले जनाएको छ ।