बिर्तामोड । तिहारको अवसरमा खेलिने देउसी भैलो राति १० बजेसम्ममात्र खेल्न पाइने भएको छ । जिल्ला प्रशासन कार्यालय झापाले बुधबार एक शुभकामना विज्ञप्ति जारी गर्दै राति १० बजेसम्म मात्र देउसी भैलो खेल्न अनुरोध गरेको हो ।

प्रमुख जिल्ला अधिकारी शिवराम पोखरेलद्वारा हस्ताक्षरित विज्ञप्तिमा अन्य व्यक्ति, टोल, समुदाय र सार्वजनिक जीवनमा असर नपर्ने गरी खुशियाली मनाउन भनिएको छ । राति १० बजेसम्ममात्र देउसी भैलो कार्यक्रम सञ्चालन गर्न, दिपावली तथा छठ मनाउने क्रममा पटका, आतिशबाजी जस्ता विष्फोटक तथा अति प्रज्वलनशिल पदार्थ आयात, ओसारपसार, बिक्री वितरण र प्रयोग नगर्न प्रजिअ पोखरेलले अनुरोध गरेका छन् ।

त्यस्तै कानुनले निषेध गरिएका जुवा तास खेल्ने खेलाउने कार्यसमेत नगर्न नगराउन आग्रह गर्दै त्यस्तो गरेको पाइएमा कानुनी कारबाही हुने समेत विज्ञप्तिमा उल्लेख गरिएको छ ।