बिर्तामोड । गएराति जाजरकोटको रामिडाँडा आसपास केन्द्रविन्दु बनाएर ६ दशमलब ४ म्याग्निच्युडको भूकम्प गएको छ । ११ बजेर ४७ मिनेटमा गएको भूकम्पमा परि जाजरकोटमा २७ जना र रुकुम पश्चिममा ३६ जनाको मृत्यु भएको प्रारम्भिक तथ्याङ्क प्राप्त भएको छ ।

भूकम्पमा परि जाजरकोटको नलगाढ नगरपालिकाकी उपप्रमुख रिता सिंहको मृत्यु भएको प्रहरीले जनाएको छ । उनको सदरमुकामस्थित घरमै सुतिरहेको अवस्थामा मृत्यु भएको हो ।

प्रधानमन्त्री प्रचण्ड आफैँ प्रभावित क्षेत्रमा जाने

खोज, उद्धार र उपचार व्यवस्थाका लागि प्रधानमन्त्री प्रचण्ड आफैं प्रभावित क्षेत्रमा जान लागेको उनका प्रेस सल्लाहकार गोविन्द आचार्यले जानकारी दिए ।

प्रधानमन्त्री स्वास्थ्यकर्मीको टोलीसहित प्रभावित क्षेत्रमा जान लागेको उनले बताए ।

घाइतेहरुको उद्धार र राहतका लागि खटिन प्रधानमन्त्री पुष्पकमल दाहाल ‘प्रचण्ड’ले निर्देशन दिएका छन । प्रधानमन्त्री प्रचण्डले भूकम्पबाट भएको मानवीय तथा भौतिक क्षतिप्रति दुःख व्यक्ति गर्दै तत्काल उद्धार र राहतका लागि खटिन निर्देशन दिएका हुन् । घाइतेहरुको उद्धारका लागि हेलिकेप्टर र स्वास्थ्यकर्मी पठाउने सरकारले तयारी गरिरहेकोछ ।