बिर्तामोड । सरकारी गाडीमा नक्कली नम्बर प्लेट राखेर कर्मचारीले कुदाउने गरेको पाइएको छ । कनकाई नगरपालिकाको नाममा रहेको सरकारी मोटरसाइकलमा नक्कली नम्बर प्लेट राखेर कार्यालयका कर्मचारीले प्रयोग गर्ने गरेको खुलेको हो ।

कनकाई नगरपालिकाको नाममा २०७५ साल जेठ २७ गते नामसारी भएको मे १ ब ५९७ नम्बरको १२५ सीसीको टीभीएस कम्पनीको मोटरसाइकलमा रातो प्लेटमा मे १० प ३८८५ नम्बर राखेर प्रयोग गर्ने गरेको पाइएको हो । स्रोतका अनुसार उक्त मोटरसाइकल कर्मचारी लक्ष्मीप्रसाद अधिकारीले प्रयोग गर्दै आएका छन् । उक्त मोटरसाइकल पाथिभरा अटो लि. को नाममा दर्ता कायम हुँदा मे १ प ३८८५ नम्बर कायम रहेको र नगरपालिकाको नाममा नामसारी भएपश्चात सरकारी नम्बर कायम गरिएको यातायात व्यवस्था कार्यालय बिर्तामोडले जनाएको छ । पुरानो नम्बर खारेज भइ नयाँ नम्बर कायम भइसकेपछि पुरानै नम्बर प्रयोग गरिनु गैर कानुनी हुने यातायात व्यवस्था कार्यालय बिर्तामोडका निमित्त कार्यालय प्रमुख पदम कट्टेलले जानकारी दिए । ‘नयाँ नम्बर कायम भइसकेपछि पुरानो नम्बर राख्नु भनेको नक्कली नम्बर प्रयोग गर्नु जस्तै हो,’ उनले भने, ‘त्यसो गर्नु कानुनी कार्य मानिँदैन ।’ उच्च पदस्थ कर्मचारीहरुको हकमा कार्यालयले निर्णय गरेर पठाए निजी नम्बर प्लेट कायम गर्न सकिने उनले बताए ।

एउटै गाडीमा दुई वटा नम्बर राखेर चलाउन नपाइने जिल्ला ट्राफिक प्रहरी कार्यालय झापाका प्रमुख प्रहरी निरीक्षक नवराज न्यौपानेले जानकारी दिए ।