बिर्तामोड । अर्जुनधारा नगरपालिका–३ स्थित खुदुनाबारी बजारनजिकै झेलेनीमा आज दिउँसो सवारी दुर्घटना हुँदा २ जनाको मृत्यु भएको छ ।

दिउँसो २ बजेतिर भित्री सडकखण्डमा उत्तरबाट दक्षिणतर्फ आउँदै गरेको लु १ च ६८६३ नम्बरको मिनी ट्रक  -छोटा हात्ती_सँग विपरित दिशाबाट जाँदै गरेको मे ५ प ४४८५ नम्बरको स्कुटर एकआपसमा ठक्कर खाँदा स्कुटरमा सवार दुवै जनाको मृत्यु भएको जिल्ला ट्राफिक प्रहरी कार्यालय झापाले जनाएको छ ।

दुर्घटनामा परी स्कुटर चालक अर्जुनधारा–२ गाजाबारीका अन्दाजी ३५ बर्षका याम भट्टराईको घटनास्थलमै मृत्यु भएको थियो । दुर्घटनामा घाइते भएका स्कुटरको पछाडी सवार गाजाबारीकै अन्दाजी ३६ बर्षका रोशन मगर गम्भीर घाइते भएको र उपचारका लागि बिर्तामोडको बीएण्डसी अस्पताल पुर्याएकोमा उपचारका क्रममा दिउँसो २ः४० बजे मृत्यु भएको प्रहरीले जनाएको छ ।

छोटा हात्ती गाडीका चालक अर्जुनधारा २ कै २५ बर्षीय हेमबहादुर श्रेष्ठ र दुवै सवारी साधनलाई अस्थाइ प्रहरी चौकी खुदुनाबारीको नियन्त्रणमा रहेको प्रहरीले जनाएको छ ।