काठमाण्डौ । दशैँको बिदामा पनि बन्दी प्रत्यक्षीकरणको सुनुवाइ हुने भएको छ । सर्वोच्च अदालतका अनुसार केही निश्चित सेवाका लागि दशैँ बिदामा पनि देशभरका अदालतहरू खुल्ने छन् । 

सर्वोच्च अदालतका सूचना अधिकारी गोविन्दप्रसाद घिमिरेले सर्वोच्चसहित देशभरका अदालतमा बन्दी प्रत्यक्षीकरणका लागि शनिवार र दसैँको टिकाको दिन बाहेक बिहान ११ बजेदेखि दिउँसो ३ बजेसम्म सुनुवाइ हुने बताए । 

उनले बन्दी प्रत्यक्षीकरणको रिट निवेदन दर्ता गर्नका लागि कर्मचारीहरूलाई बिहान १० बजे नै उपस्थित हुन भनिएको पनि बताए । 

सर्वोच्च अदालतले असोज २९ गतेदेखि कात्तिक १० गतेसम्म सर्वोच्च अदालतमा उपस्थित हुने न्यायाधीशहरूको सूचीसमेत सार्वजनिक गरेको उनले जानकारी दिए ।