बिर्तामोड । झापाको शिवसताक्षी नगरपालिका अन्तर्गत माइधारमा बिहीबार बिहान भएको सवारी दुर्घटनामा परि एक जनाको मृत्यु भएको छ भने अन्य दुई जना गम्भिर घाइते भएका छन् ।

दुर्घटनामा परेर झापा गाउँपालिका वडा नम्बर ३ का २० वर्षीय भविस श्रेष्ठको मृत्यु भएको प्रहरीले जनाएको छ ।

बिहीबार विहान साढे तीन बजे पश्चिमबाट पूर्व तर्फ आउँदै गरेको प्रदेश १–०१–०१६ प ४२८८ नम्बरको स्कुटर र पश्चिम तर्फ जाँदै गरेको एनएमसी डेरीको मे १ च ५८६८ गाडी एकआपसमा ठक्कर खाँदा सो दुर्घटना भएको थियो ।

दुर्घटनामा परेर स्कुटर चालक श्रेष्ठसहित अन्य सवार झापा ७ का निशान शिवाकोटी र झापा २ का सुसान थापा गम्भिर घाइते भएका थिए । उनीहरुलाई उपचारको लागि बीएण्डसी अस्पताल ल्याइएकोमा उपचारको क्रममा श्रेष्ठको मृत्यु भएको जिल्ला ट्राफिक प्रहरी कार्यालय झापाले जनाएको छ । घाइते अन्य दुवैजनाको अवस्था गम्भिर रहेको प्रहरीले जनाएको छ ।

दुर्घटनामा संलग्न दुवै सवारी साधन र गाडी चालक मेचीनगर ६ का २९ बर्षीय सुरेश बानिँया प्रहरी कार्यालय झिलझिलेको नियन्त्रणमा रहेको प्रहरीले जनाएको छ ।