बिर्तामोड । इलाम झापा मैत्री समाज बिर्तामोड नगर समितिले असोज २२ गते सोमबार रक्तदान कार्यक्रम आयोजना गर्ने भएको छ । समाजले डेंगु लगायतका कारण अस्पतालहरुमा रगतको अभाव भएको भन्दै रक्तदान आयोजना गर्न लागेको हो ।

मैत्री समाजले अन्य इच्छुक संघसंस्थाहरु सँग समन्वय गरी रक्तदान कार्यक्रम आयोजना गर्न लागेको इलाम झापा मैत्री समाज बिर्तामोड नगर कमिटिका सचिव मिलन कोइरालाले जानकारी दिए । अस्पतालमा भएको रगत अभावलाई केहि हदसम्म भएपनि परिपूर्ती गर्न कार्यक्रम आयोजना गर्न लागिएको भन्दै समाजकी नगर अध्यक्ष अञ्जु लामिछानेले सहकार्यका लागि अन्य संघसंस्थाहरुलाई आग्रह गरिन् ।

रक्तदान मुक्तिचोकस्थित दुर्गा मन्दिर परिसरमा विहान ९ बजेदेखि राखिएको संस्थाले जनाएको छ ।

समाजले नजिकिँदो चाडपर्वको अवसरमा असोज २८ गते आइतबार घटस्थापनाका दिन इलामबाट झापा आएर स्थायी/अस्थायी बसोबास गर्ने महानुभावहरुको उपस्थितीमा शुभकामना आदान प्रदान कार्यक्रमसमेत आयोजना गर्न लागेको जिल्ला अध्यक्ष तिलोत्तमा खत्रीले जानकारी दिइन् ।