बजाजको ‘एनएस १२५’ अब सुरुङ्गामा
बिर्तामोड । बजाज कम्पनीको नयाँ ब्राण्ड पल्सर ‘एनएस १२५’ झापाको सुरुङ्गामा सार्वजनिक गरिएको छ । कम्पनीको आधिकारिक डिलर आरए ट्रेडर्स अटो प्रालिले पल्सर एनएस १२५ को बिहिबार एक कार्यक्रमका बिच सार्वजनिक गरेको हो ।
विहिबार आरएले आयोजना गरेको कार्यक्रममा कनकाई नगरपालिकाका नगरप्रमुख राजेन्द्रकुमार पोखरेल र आरएका प्रबन्ध निर्देशक राजेन्द्रकुमार थापाले संयुक्त रुपमा बाइक सार्वजनिक गरेका हुन् । चाडपर्वलाई लक्षित गरि बजाजले नयाँ मोडल बजारमा ल्याएको बताइएको छ ।
एनएस १२५ युवा सर्कलका लागि लक्षित गरि ल्याइएको स्पोर्टस बाइक भएको आरए अटो ट्रेडर्सका सेल्स अफिसर लावन्य ढकालले बताए । उनका अनुसार बाइकको सकअपमा नाइट्रोजन ग्यासको प्रयोग गरिएकाले बढी लचक हुने गर्दछ । बिएस सिक्स मापदण्ड रहेको यस बाइकमा १२ लिटरको ट्याङ्की, फ्रण्ट डिस्क ब्रेक र १२ भोल्टको व्याट्री रहेको ढकालले बताए । बाइकले ६० किलोमिटर माइलेज दिने उनको भनाई छ । सस्तो मूल्यमा हेभी लुक्समा बाइक आएकाले ग्राहक माझ लोकप्रिय हुने विक्रेताको अपेक्षा रहेको छ । बाइकको मुल्य २ लाख ७९ हजार ९ सय रुपैँया पर्ने आरएका व्यवस्थापक सोकेन्द्र गौतमले जानकारी दिए ।
कार्यक्रममा बोल्दै कनकाई नगरप्रमुख राजेन्द्रकुमार पोखरेलले व्यवसायका लागि आफ्नो नगर छनौट गरेको भन्दै आरएका प्रबन्ध निर्देशक राजेन्द्रकुमार थापा र प्रबन्धक अनुशिल थापालाई धन्यवाद दिए । यस्तो जटिल परिस्थितीमा पनि व्यवसाय शुरु गरेको भन्दै नगरप्रमुख पोखरेलले थापाद्वयको व्यवसायीक सफलताको कामना गरे ।
कार्यक्रममा उपस्थित सबैलाई धन्यवाद दिँदै प्रबन्ध निर्देशक थापाले युवाहरु विदेश पलायन भइरहेको अवस्थामा रोक्न छोरा अनुशिललाई यो व्यवसाय शुरु गरिदिएको र ३५ बर्षदेखि आफू व्यवसायमा रहेकाले अब पुस्ता हस्तान्तरणको प्रक्रियामा रहेको भन्दै सहयोगका लागि सबैलाई अनुरोध गरे ।
कार्यक्रममा नेपाल उद्योग वाणिज्य संघ प्रदेश १ सदस्य कुमारमणी पोखरेल, आरएका शोरुम मेनेजर रबिन भट्टराई, बजाज कम्पनीका सर्भिस मेनेजर महेश्वर मण्डल, सर्भिस इन्जिनियर सुमन यादवलगायतको उपस्थिती रहेको थियो ।