बिर्तामोड । बिहीबार राति परेको पानीका कारण लाखौँ मुल्यको कुच्चोमा क्षति पुगेको छ । बिर्तामोड २ स्थित ऋतिका कृषिजन्य सामाग्री खरिद बिक्री केन्द्रको करिब ५० लाख बराबरको कुच्चोमा क्षति पुगेको हो ।

पूर्वी पहाडी जिल्लाहरुबाट संकलन गरी फिजाएर राखेको कुच्चो अबिरल बषाका कारण डुबानमा पर्दा क्षति भएको केन्द्रका सञ्चालक भक्ति पाठकले जानकारी दिए । प्याकिङ गरी भारत निकासीका लागि कुच्चो सुकाइएको अवस्थामा पानी पर्दा डुबानमा परेको उनको भनाई छ । पानी आउने संकेत नभई एक्कासी पानी पर्दा ठूलो मात्रामा फिजाँइएको कुच्चो सुरक्षित गर्न नसकिएको उनले बताए ।

नगदे बालीको रुपमा इलाम, पाँचथर, ताप्लेजुङ, तेह्रथुमलगायतका जिल्लाहरुमा उत्पादित कुच्चो झापामा संकलन गरी पूर्वी नाका हुँदै भारत निकासी गर्ने गरिएको छ ।