झापा । नेकपा एमालेका अध्यक्ष केपी शर्मा ओलीले पार्टी नेतृत्व हस्तान्तरण नगर्ने बताएका छन् । सत्ता र संसद नै विगठन गराउने गरी भदौ २३ र २४ गते आन्दोलन गरेका जेन जीहरुले पार्टी नेतृत्व युवा पुस्तामा हस्तान्तरण गर्नु पर्ने बताइरहँदा एमाले अध्यक्ष ओलीले आफुले सकेसम्म पार्टीको नेतृत्व गरिरहने अडान लिएका हुन् ।

सोमबार, मंगलबार र बुधबार विभिन्न प्रदेश र जिल्लाका अध्यक्षहरूसँग भर्चुअल संवादमा जोडिएका ओलीले नेता कार्यकर्ताहरुसँग यस्तो भनाई राखेका हुन् । पुनर्गठनको विषय उठेपछि ओलीले भने– ‘जबसम्म सक्छु, छाड्दिनँ । नेकपा एमाले मोरङ अध्यक्ष अजम्बर राईले पार्टीको नियमित महाधिवेशन गर्नुपर्ने कुरा उठेको बताए । उनीसहित भोजपुर,उदयपुर र धनकुटाका अध्यक्षहरूले पार्टीको नियमित महाधिवेशन माग गरेका हुन् । नेताहरूले मंसिरमा महाधिवेशन गर्नुपर्ने बताएका थिए ।

प्रदेश तथा जिल्लाका नेताहरूले ओलीलाई चाँडोभन्दा चाँढो महाधिवेशन गराउन ध्यानाकर्षण गराएका थिए ।

सो क्रममा ओलीले पार्टी महाधिवेशन हुने र त्यसको निष्कर्ष सबैले स्वीकार्नुपर्ने बताए । ‘पार्टी महाधिवेशनमा जाने नै हो, जाऔंला, त्यसअघि अहिलेको परिस्थितिसँग सबै एकजुट भएर जुट्नु छ,’ एक जिल्ला अध्यक्षले भने ।

विशेषगरी कोशी प्रदेशका जिल्ला अध्यक्षहरूले पार्टीको महाधिवेशनका लागि जोड गरेका थिए । उनले यो कुरा भन्नुअघि धेरैले पार्टी पुनर्गठनको मुद्दा उठाएका थिए ।

‘पार्टी केही न केही सम्हालिएर अघि बढ्नुपर्छ, पुनर्गठन नै गरेर जानुपर्छ भन्नेतिर छलफल गयो,’ ती नेताले भने, ‘त्यसपछि उहाँले आफू सक्ने बेलासम्म नछाड्ने बताउनुभएको हो ।’