बिर्तामोड । चैत्र २० गतेदेखि आन्दोलनरत शिक्षकलाई वार्ताका लागि सरकारले आग्रह गरेको छ । आज विहान ७ः३० बजे वार्तामा आउन आग्रह गरेको हो ।

शुक्रबार एक विज्ञप्ति जारी गरी शिक्षा, विज्ञान तथा प्रविधि मन्त्रालयले वार्ता र संवादका माध्यमबाट समस्या समाधान गर्न भन्दै आन्दोलनरत शिक्षकहरुलाई वार्ताका लागि आह्वान गरेको हो । नवनियुक्त शिक्षामन्त्री रघुजी पन्तलाई भेट्न शुक्रबार गएका शिक्षकहरु मन्त्रालयको गेटबाटै फर्किएका थिए । शिक्षकको तर्फबाट २५ जनालाई पासको समेत व्यवस्था गरिसकेको अवस्थामा ती नामहरु शिक्षकको तर्फबाट नदिइएको भन्दै मन्त्रीलाई नभेटी उनीहरु फर्किएका थिए ।

लामो समयदेखि शिक्षकहरुले काठमाण्डौको सडकमा आन्दोलन गरिरहँदा शैक्षिक कार्यक्रम नै प्रभावित हुने अवस्थामा सर्वोच्च अदालतले तीन दिन भित्र शिक्षकलाई फर्काउने वातावरण बनाउन आदेश दिएको थियो । सर्वोच्चको आदेशपछि सरकार शिक्षकसँग वार्ता गरेर जायज माग सम्बोधन गर्न क्रियाशिल बनेको हो ।